كود -وكالات//

ماشي غير لعابة الكرة اللي كيتباعو بالملايين فالميركاتو الصيفي ،حتى الكورة اللي دخلات لتاريخ مع مارادونا تباعت بالثمن،الكرة اللي سجل بها الأسطورة الأرجنتيني دييغو مارادونا بيتو المشهور «يد الله» ضد نگليز فمونديال 1986، تباعت فمزاد أمريكي بـ3.35 مليون دولار، يعني حوالي 2.87 مليون أورو.

الكرة من نوع «Adidas Azteca»، وهي نفس الكرة اللي استعملها مارادونا فربع نهائي كأس العالم بالمكسيك، فالماتش اللي ربحاتو الأرجنتين على إنجلترا بـ2 لواحد، مارادونا سجل البيت الأول بيدو، فلقطة ما شافهاش الحكم، والهدف ولى من بعد معروف عالمياً باسم «يد الله». وبعدها غير بأربع دقايق، دار واحد من أشهر الانطلاقات الفردية فالتاريخ، راوغ فيها لاعبين إنجليز وسجل الهدف اللي تصنف من بعد كـ«هدف القرن».

المزاد نظماتو دار Heritage Auctions، والكرة كانت داخلة للمزاد بتقديرات كبيرة بزاف، حيث كانت الدار كتتوقع توصل لأكثر من 10 ملايين دولار. ولكن الثمن النهائي وقف ف 3.35 مليون دولار، يعني أقل بزاف من التوقعات، المزايدة لي بدات من 2.5 مليون دولار.

والأغرب هو أن القميص اللي كان لابس مارادونا فداك الماتش سبق وتباع فـ2022 ب 9.3 مليون دولار، يعني تقريباً ثلاثة مرات الثمن اللي جابتو الكرة.

الكرة كانت عند الحكم التونسي علي بن ناصر، اللي حكم داك الماتش واحتافظ بها لمدة 36 عام، قبل ما يبيعوا فـ2022 ،ودابا، من بعد أربع سنين، عاودات دخلات للسوق وتباعت بأكثر من 3.3 مليون دولار.