كود -عثمان الشرقي//

عاشت مدينة بجعد، نهار الأحد، أجواء استثنائية بمناسبة طقس “التعركيبة” السنوي، لي كيتعتبر مسك الختام ديال موسم سيدي بوعبيد الشرقي.

المدينة استقبلات آلاف الزوار لي جاو من كل قنت باش يحضرو لهاد اللوحة الفلكلورية الحية، الموكب انطلق مع 10 د صباح من أضرحة “رجال الميعاد” على إيقاعات الجدبة الشرقاوية والحضرة الشكدالية، وسط تعزيزات أمنية مكثفة واكبات هاد الحدث باش تحمي المشاركين والمتفرجين من “مالين الحال” وتضمن دوز الأجواء فظروف مزيانة.

هاد الطقس  هو موروث تاريخي كيرجع لقرون حيت تأسس هاد كعربون ولاء ووفاء من قبائل السماعلة لي كانت خادمة للزاوية الشرقاوية (فيديو)

كتناوب القبائل السمعلية كل عام باش تقدم هاد الهدية لي كتكون عجل صفر كتعبير على المحبة والتقدير للأدوار الدينية، العلمية، والصلحية لي لعباتها الزاوية فمنطقة تادلا والمغرب كامل، وهو موروث حافظ على الاستمرارية ديالو كرمز للتضامن والاتحاد القبلي.

الموكب استغرق ساعتين باش يوصل لضريح بوعبيد الشرقي. وكلما قرب من الضريح، إلا وزاد الحماس والهيجان وطلعات أصوات الزغاريت والغوات، وتزاد “الحال” على الحيارة والمجاذيب.

الآلاف ديال الزوار دارو سياج بشري كبير، وفهاد اللحظة بدات طوائف المجاذيب، رجال وعيالات، كيتحيرو وكيشدهم الحال كل ما زادو قربو كتر وكتر.

وملي وصل العجل لساحة الضريح، اندفعو عشرات الشباب والمجاذيب بقوة باش يشدوه ويشلو الحركة ديالو. وهنا كيبان المعنى الحقيقي ديال «التعركيبة»، فين كيتجمعو عليه وكيطيحوه للأرض وسط تدافع الجماهير ، وفهاد اللحظة كيوصل الطقس للنرفانا الروحية ديالو فاش كيتذبح العجل، وكيدخلو المجاذيب فـ”الحالة” أو “الجذبة”، وهو نوع من التفريغ النفسي والروحي .

من بعد ما سالا هاد الطقس، اندفعو المئات من الناس باش يزوروا ضريح بوعبيد الشرقي، وتخلطات أصوات البكاء والزغاريت فجناب القبة، مع دعوات الاستغاثة بحال “احنا مضيومين ابوعبيد”، “راني في عارك أ بوعبيد”، و”اتگعد راني قاصداك”. والمثير للانتباه أن حتى أطفال صغار، فالعمر ديالهم تقريبا 14 عام، كيشدهم الحال ويسخفو وهوما كيتبركو فجناب الضريح أو ملي كيقرا عليهم الشريف.

حجاج بوعبيد الشرقي كيف عينات كود من مختلف الفئات، الأعمار، والشرائح الاجتماعي، فيهم لي حضر غير فداك النهار، وفيهم لي كاري بيت أو دار فجناب الضريح طول أيام الموسم هادشي  بلا مئات الخيام لي منصوبة على برا.

وفحوار شفهي مع أحد الزوار — نظرا لأن التصوير ممنوع داخل وخارج الضريح — صرح لينا واحد السيد بلي كيجي هو وعائلتو كل عام من النواحي خريبكة وأنه إلا مجاش يزور بوعبيد فهاد المناسبة كيبقا دارّو راسو وكيدورش عليه العام بالربح، سيدة اخرى صرحات لنا أن هاد النهار عندها هو العيد و كتبقا تحسب ليه بنهار والشهورة وكتسنا غير امتا تجي هي وبناتها لي كاينين ففاس باش يديرو الواجب ويحيدو العار.

أما شابة تلاتينية قالت لكود أنها قررات هاد العام متجيش لضريح وسدات على راسها فالدار بالقفولة وعطات السوارت لختها ولكن معرفاتش كيفاش حتى جات من واد زم وصبحات اليوم بلا خاطرها فالتعركيبة، وزادت قالت لنا راه “أغلب لي كيتحيرو دابا من غير مالين الحال،عيالات مشدود ليهم ولادهم فالحبس ولا هارب عليهم الراجل ولي منهم انا”

تاريخيا، كيتعتبر بوعبيد الشرقي، لي عاش فالقرن السادس عشر ، هو المؤسس الفعلي لهاد القلعة الصوفية بأبي الجعد. الزاوية الشرقاوية لي لعبات أدوار سياسية فالمغرب، خاصة فاش كانت كتصلح بين القبائل المتناحرة وبين المخزن، هاد المكانة التاريخية خلاتها تحظى باحترام كبير من سلاطين المغرب لي عطاوها “ظهائر التوقير والاحترام”، وشي لي كيفسر علاش قبائل بحال “السماعلة” و”بني زمور” بقات وفية لهاد الرابط التاريخي وكتقدم “الهدية” كل عام كاستمرار لعهد قديم كيرجع لقرون.

من الجانب الثقافي، طقس “التعركيبة” ماشي غير ذبيحة، وإنما هو”ظاهرة  ثقافية” كتلخص الأنثروبولوجيا الثقافية ديال المنطقة، هاد الطقس هو “مسرحة حية” للموروث الشعبي، فين كيتلاقى فيه التصوف الطرقي مع الممارسات الشعبية بحال “الجذبة” و”الحال”. هاد الممارسات كتعتبر فالمخيال الشعبي وسيلة للتطهير النفسي والروحي، فين كيتخلص الفرد والمجتمع من الشحنات السلبية وضغوطات الحياة اليومية وسط طقوس جماعية كتعزز الهوية وكتقوي التماسك الاجتماعي.

أما على المستوى الاقتصادي، فموسم سيدي بوعبيد الشرقي كيتعتبر رئة مالية  و إنعاش  حقيقي لمدينة أبي الجعد حيت أيام الموسم، كتعيش المدينة رواج تجاري استثنائي، كينتعش فيه الكراء وكتحرك تجارة القرب، بحال بيع المنتوجات التقليدية، البخور، الحنا، والحلويات و الشمع ،هاد التظاهرة كتتحول لسوق مفتوح كيدعم السياحة الروحية والتضامنية، وكيخلق فرص شغل مؤقتة للمئات من شباب المنطقة، لي كينتظرو هاد الموعد السنوي باش ييدورو الحركة .

واحد من المتتبعين لموسم قال لكود أن هاد الطقس التاريخي والثقافي ما خصوش يبقى مخبي وإنما خاصو يحظى بتغطية إعلامية كبيرة ويتنقل مباشرة فالقنوات الوطنية باش يولي للموسم إشعاع دولي. وأضاف أن أي واحد ما بغاش يتصور، فمن الأحسن ما يجيش وما يشاركش فالطقس، عوض ما يبقاو مالين التلفونات كيتعرضو للمطاردات والاعتداءات وتكسير الهواتف ديالهم.