هند لكلاوي كود ////

هشام لمهاجري برلماني شيشاوة والقيادي فحزب التراكتور اللي فالائتلاف الحكومي، هاجم وزير الصحة التجمعي امين تهراوي. الاغلبية مضاربة بيناتها. لمهاجري تهكم على اجوبة وزير الصحة وقال ليه تشات جي بي تي” كتقول ليه باش سولها نفس الاجوبة اللي كتقولها فالبرلمان، وجبد ليه صبيطار ايمنتانوت اللي كامل ومازال ما تحلش.

طبعا هاد الهجوم ماشي مجاني. جا فسياق خايب عايشو البام وقيادة البام ووزراء البام: فاطمة الزهراء المنصوري وزيرة السكنى وسياسة المدن والتعمير وعبد اللطيف وهبي وزير العدل على خلفية تسريبات “جبروت” على اراضي باعوها او وهبوها.

حسب برلماني تجمعي ل”كود” لمهاجري، عودنا “فكل مناسبة سياسية كيخرج غير باش يدير البلبلة، خرج هاد الأيام بهجوم على وزير الصحة أمين الطهراوي، فاش قال بأن مستشفى إيمنتانوت باقي ما وصل لحتى نتيجة، وأن الناس باقي كتعاني”.

مصدر “كود” قال باللي فهاد القضية “الواقع والمعطيات الرسمية كتفضحو”.

حسب برلماني التجمع اللي فضل عدم الكشف على اسمو ف”الوزير أمين الطهراوي، تعامل برزانة واحترام، وما بغاش يدخل فالمستوى اللي بغى يجرّو ليه المهاجري، مراعاة لوحدة الأغلبية وحرصاً على الانسجام اللي كيدافع عليه رئيس الحكومة”

دابا هاد الصبيطار اللي خربق مكونات الاغلبية فين وصل. حسب مصادر رسمية من وزارة الصحة توصلات بها “كود” ف”المستشفى الجديد فإيمنتانوت راه سالا. الأشغال فيه كملات بنسبة 100%، والتجهيزات وصلات لـ99%، والمشروع كلو راه غادي يدخل الخدمة قريباً”.

مصدر اكد ل”كود” باللي الافتتاح محتمل جدا يكون شهر غشت.

لمهاجري قال ل”كود” باللي فراسو الصبيطار واجد وهادي 4 شهور وباللي الوكالة الوطنية للتجهيزات العامة اللي تكلفات بالبناء سلماتو وجاهز. لمهاجري قال ل”كود” باللي سؤالو ماشي على هاد الشي ولكن على علاش معطل ومازال ما تفتاتحش، واضاف ل”كود” باللي الهدف ديالو يخدم. وقال باللي حاول يتاصل بالوزير عبر مراسلات رسمية على الموضوع وما جاوبوش وعليها طرح السؤال.

الصبيطار مزيان للمدينة، حسب مصادر “كود” فمساحتو كلها 50 ألف متر مربع، والمساحة المبنية فيه هي 7000 متر مربع. هاد الصبيطار فيه 45 سرير وكيف قال مصدر ل”كود” راه “مشروع مهيكل ومتكامل”.

وفق معطيات “كود” الرسمية فالطابق الارضي فيه الإدارة، الاستشارات الخارجية، المختبر، التصوير الطبي، الصيدلية، المستعجلات، قاعة العمليات، وحدة الولادة، التعقيم، مستودع الأموات، المغسلة، ومرافق مشتركة. والطابق العلوي كاينة فيه وحدة التوليد، استشفاء الأم والطفل، وحدة الأطفال، استشفاء الجراحة، واستشفاء الطب العام.

تمويل هاد المشروع جا من الميزانية العامة ديال وزارة الصحة والحماية الاجتماعية. هاد المشروع كان باشراف الوزارة كمُتدخِّلة رئيسية واللي بناه كيف ذكرنا هي الوكالة الوطنية للتجهيزات العمومية كمُتدخِّلة مفوضة

الكلفة الإجمالية ديال المشروع وصلت لـ14 مليار سنتيم، منهم 89 مليار مخصصة للدراسات والبناء، و25 مليار خصصات للتجهيزات الطبية.

حسب مصدر “كود” التجمعي ف”كل هادشي كيبين بالملموس أن الحكومة ماشي كتخدم، ولكن كتنجز مشاريع كبيرة فصمت، وكتجاوب على مطالب الساكنة بالفعل ماشي بالهضرة. والمواطن فإيمنتانوت غادي يستافد من واحد المستشفى اللي فيه جميع الشروط الطبية، وغايفتح آفاق جديدة فالرعاية الصحية ديال المنطقة” واضاف باللي “المستشفى راه واجد، والصور موجودة، والحقائق باينة” وباللي “لمهاجري ما يقول دابا؟” يختم مصدر “كود” التجمعي”

حسب مصادر “كود” فمن بين مشاكل هاد الصبيطار كانت الحراسة. صفقة الحراسة يالله خرجات. لكن المجلس البلدي للمدينة والمجلس الاقليمي اكدا ل”كود” باللي عندهم الحل. حسب مصادر محلية ل”كود” فراهم قادرين يوجدو السيكوريتي للصبيطار شهر او شهرين حتى يحسمو فالصفقة.

دابا كتبان القضية سياسية وحروب داخلية بين مكونات الاغلبية. التجمعي قال ل”كود” باللي المهاجري، اللي معروف بتغيباتو المتكررة على جلسات محاكمته فملفات عندها علاقة بالفساد وسوء التدبير والإهمال، ماشي أول مرة كيلعب دور “المشوش الرسمي”.

واضاف باللي دورو “خايب” عطاوه ليه باش رجع للمكتب السياسي، وهو “مهاجمة الحلفاء ديالو وسط الحكومة، خاصة وزراء الاحرار،، باش يخلق الصداع ويبان هو الراجل السياسي اللي “ما ساكتش”، ولكن الحقيقة باينة: كيبغي غير يغطي على قضايا دايرة حالة ديال قيادات الحزب”