هشام اعناجي – كود من طوري باتشيكو//

شهر وايام قليلة دازت على المواجهات اللي عرفاتها طوري باتشيكو من بعد الاعتداء اللي وقع على مست اسباني، واللي تحوّلت بسببو هاد البلدة الصغيرة فمورسيا لواجهة إعلامية ونقاش سياسي على الهجرة والعنصرية فإسبانيا.

“كود” رجعات مرة أخرى للمنطقة، البداية كانت من مورسيا ليلة جمعة كانت الحرارة طالعا بزاف، تمشى فيها كادوخ، فهاد المدينة كولشي مخبي فدارو ولا هاجر لمناطق اخرى.

ليلة الجمعة فمورسيا.. الصهد

وصلت لمورسيا ليلة الجمعة، الحرارة فوق 40 درجة، والمدينة كلها كتحس بيها كاتغلي بحال شي فران كبير، تحرك شويا تعرق ويلا تمشيتي شويا فالشمس دوخ.

محطة الطوبيس الكبيرة، فاش وصلت، كانت عامرة بالوجوه المتعبة، مهاجرين مغاربة وجزائريين جالسين بالساعات فيها، بحال إلا ماعندهومش فين يمشيو، وكاين اللي كيتسنا فرص باش يطلب ولا حتى يسرق. السعاية كاينا.

المقاهي اللي ف المحطة منقسمين، شي مقاهي متلقاش فيها السعاية والعرب والافارقة، خصوصا لي كيبقاو جالسين لساعات بلا كونصوماسيون، وكاين مقاهي اخرى فيها النظام، وماشي اي واحد يدخل.
طبعا ولأنني وصلت معطل فالعشية، فميمكنش الا نبات فمورسيا، حيث مكاينش ترونسبور ل طوري، اضافة الى الحرارة المفرطة.

السبت.. لقاء “أمازيغي أمازيغي” فالطوبيس

نهار السبت 16 غشت، الحرارة كانت قاسية كثر، الجو كيخنق يلا بقيتي فالمحطة ومدخلتيش للمقهى ، وانا كنتسنى الطوبيس اللي كيمشي لطوري باتشيكو مع السبعة ديال لعشية.

وسط هاد الأجواء، تسرق ليا صاك صغير فواحد من هاد القهاوي، هنا تذكرت كلام “الخطاف” لي وصلني للمحطة، “حظي جنابك..كاينين شي وحدين كيسيئو لينا كمغاربة، كيبقاو فالمحطة لساعات كيتسنا اما يشفرو ولا يتسمسرو مع الخطافا”.

اكثر خمس ساعات ف المحطة، واخيرا جات الحافلة لي غادا ل طوري باتشيكو، فهاد اللحظة تلاقيت مع عمر، راجل ستيني من بني ملال، أمازيغي، ملامحو هادئة ولكن فيها أثر السنين والتمارة.

عمر، الرجل الستيني من بني ملال، كان لابس قاميجا بيضة مخططة بالزرق مفتوحة من العنق، التجاعيد باينا على وجهو، كأن كل تجعيدة عندهاد حكاية. كيحرك يديه بزاف وهو كيهضر على “خوان”، وكيوقف لحظة يسكت بحال اللي كيسترجع صور من الذاكرة.

عمر اختار يتحدث الامازيغية، حكى ل”گود” كيفاش توقف مساره المهني من بعد حادثة شغل، وكيفاش الإسباني “خوان” وقف معاه وعاونُو فالتطبيق وبالمحامي: “وقف معايا فالمصحة، خلص المحامي، ما خلانيش نضيع. حتى من بعد ما توفى، باقي حاضر فذاكرتي”.

القصة ديالو كانت صورة أخرى للتعايش والإنسانية اللي كتربط بين الإسبان والمهاجرين المغاربة.

الوصول لطوري باتشيكو.. لقاء باولينو روس

وصلت لطوري باتشيكو مع الثامنة وثلث، كان استقبالي في باولينو روس، ناشط إعلامي وباحث إسباني معروف بمواقفو المناهضة للعنصرية. محبوب عند المهاجرين، وهو لي كيقول بلي راهم “الركيزة ديال الاقتصاد المحلي وخاص حلول للاندماج وماشي نشر خطاب الكراهية ضدهم”.

بدا معايا الجولة من محطة الطوبيس بالضبط، اللي كانت مسرح الأحداث الأخيرة. وصف لينا كيفاش وقعات وطرات، وهادي أول مرة “گود” كتنقل مكان وقوع المدابزات والمناوشات بين فوكس والمهاجرين، موراها دخلنا لأحياء شعبية، محلات صغيرة، ومقاهي بعضها مغلق والبعض الاخر عامر بالعمال المغاربة والأفارقة.

صالح: “اللي نوضو الصداع خداو العقاب”..دبا كولشي مزيان والحركة مزيانة

فـ “قهوة إسطنبول” الشهيرة، اللي حتى هي كانت وسط الأحداث، استقبلنا صالح، مهاجر مغربي مسير القهوة. بابتسامة كبيرة قال: “أيادي خفية ربما مور دىك الاحداث.. دبا الاسبان مع المغاربة مزيانين. اللي نوضو الصداع خداو العقاب”.

واضاف صالح، :”البوليس دارو خدمتهم مزيان، كانو واقفين حدا القهوة وماخلاوش شي حاجة تكبر. القهوة ديالي عامرة، وحتى الاسبان كيجيو يشربو عندي الكافي. أنا مرتاح نفسيا، خصوصا منين شفت الأمن كيوقف معانا حتى للثلاثة دالصباح”.

حسين: كاينين فئة كيديرو الصداع..وانا ساكن مع اسبانية بخيير وصعود فوكس ولا هبوطو مغادي يغير والو

فجوار القهوة، جلس حسين، مغربي فالثلاثينات، لابس تيشورت خفيف، ملامحو فيها شجاعة وهدوء. كيعيش فاسبانيا من 2010 تقريباً، وقال لـ “كود”: “اللي وقع داك الأسبوع ماشي ساهل، ولكن خاصنا نكونو واقعيين: ماشي حنا ملائكة، كاين شي فئة كيديرو الفوضى وكيشربو بطرق خايبة. أنا كنت تما ملي ناض العصا وماجا عندي حتى واحد يستهدفني. العنصرية كاينة ولكن ماشي بالمعنى ديال يوقفوك ويعايرو. كاينة فالنظرات والتصرفات، خصوصا من بعد هاد الأحداث”.

وأضاف حسين: “السياسيين بحال فوكس والحزب الشعبي، من سنين وهما كيلعبو على وتر الهجرة، وكيكذبو على الناس ديالهم. ولكن الواقع، الاقتصاد كامل ديال مورسيا هازينو المغاربة. 99 فالمية خدامين على راسهم، قليل اللي كيدير المشاكل”.

طوري باتشيكو.. مدينة زراعية على أعصابها

أول صورة كتشد انتباه، القادمين لطوري، هي طيارة مجسّمة واقفة ف رومبوان د دخلة للمدينة، الطيارة رمز لهاد المدينة، وكانت وسيلة نقل لملاك الاراضي والفيرمات.

طوري باتشيكو اليوم كتشبه مدينة “شبح” فالصيف بحيث الشوارع خاوية فالنهار، المقاهي كتعمر غير بالليل، والناس كتسنا فصل شهر تسعود يدخل باش ترجع الحقول تخدم.

طوري باتشيكو مدينة زراعية بامتياز. الحقول المحيطة بها هي القلب النابض، والمهاجرون كيشكلو عمودها الفقري. الاحياء كتبان جد عادية وبسيطة. لكن مع الصيف، ومع سفر آلاف المغاربة نحو بلدهم، كتبات البلدة شبه فارغة، كأنها مدينة أشباح.

الصور التقطتها “گود” لواجهة حانة “Cuatro Rosas” الخضراء المغلقة عكست هذا الواقع، شوارع بلا حركة، محلات مسدودة، وحياة معلّقة حتى يرجعو المهاجرين.

الأحياء الشعبية بحال سان أنطونيو ولا لاس دوراداس كلها عامرة بالمغاربة والأفارقة. المحلات التجارية بسيطة، مغاسل آلية، مطاعم كباب (واحد منهم مازال مسدود بعدما تهجم عليه متطرفين). وفق ما وثقته “گود”.

قهاوي المغاربة.. من للخلعة للضحك والتعاويد كأنك ف بركان او جرادة

فمسار الربورتاج، مع باولينا، كان أول مطعم مشينا ليه هو قهوة علال. بلاصة معروفة وسط لمغاربة، ولكن ملي دخلنا الشباب مبغاوش يصرحو للاعلام، وبعض الكهول سولناهم وقالو :”إيلا جا علال هو اللي يقنعهم يهضرو.”، الوقت كيزاحم عندي ساعة فقط.

من بعد مشينا لـ قهوة إسطنبول. هنا الأجواء مختلفة بزاف. القهوة اللي كانت محاصرة بالبوليس وشريط أصفر فالأحداث الأخيرة رجعات ليها الحياة بالضحك والكورة. لقينا مغاربة وافارقة متبعين ماتش شاعل برشلونة ضد مايوركا. هنا خدينا. شهادات وصور وفيديوهات.

مقهى اسطنبول مضوية بألوان زاهية: شاشةة كبيرة معلقة، والزبناء كيدخنو وكيتفرجو فالبارصا. أصوات ضحك ونقاشات بالدارجة، بالإسبانية، وحتى شوية بالفرانكوفونية. صالح، مول المقهى، شاب ممتلئ الجسم، لابس تيشورت بيض، كيهضر بثقة وبابتسامة كبيرة.

باولينو أكد لـ “كود” فالجولة أن المدينة عايشة تناقض كبير: اقتصادها كيتبنى على المهاجرين، ولكن الخطاب السياسي ديال اليمين كيبغي يصورهم خطر. حتى الاعلام الاسباني كيساهم فهاد النمطية.

حوار “گود” مع الناشط الاسباني باولينو روس، وكذلك فيديو خاص بشهادات موثقة ومشاهد المدينة، سينشر لاحقا.

وتشير الارقام الرسمية إلى أن  123,468 مغربيًا إلى إسبانيا سنة 2023، ما يجعلهم ثاني أكبر جالية بعد الكولومبيين.

وفي إقليم مورسيا، يُقدّر أن أكثر من 12.3% من السكان من أصول مغربية، يعمل غالبيتهم في الزراعة، في ظروف صعبة وقانونية هشة.

وتشير تقارير مثل Foro Inmigración وSOS Racismo إلى ارتفاع بنسبة 19.2% في جرائم الكراهية ضد المهاجرين منذ 2021، مع نسبة تبليغ لا تتجاوز 20%.

وتعود تفاصيل، الأحداث، الو يوم التاسع من يوليو 2025، حين تعرّض رجل إسباني مسن (68 عامًا) لاعتداء من طرف ثلاثة شبّان في بلدة طوري باتشيكو بمورسيا. موراها ناضت دعوات عنصرية من اليمين المتطرف ضد المهاجرين المغاربة دون غيرهم من باقي الجنسيات.