سعيد الشاوي لبروج سطات ///

ماشي بعيد على لبروج فجماعة لقراقرة الشمالية فبني مسكين كان هاد السيمانا عرس من عراسيات الصردي. هاد النوع ديال الغنم المعروفة بيه المنطقة. عراسية ديال بصاح دارت على 3 ايام =5 و6 و7 فبراير= فيها لوشم ديال لفحولة والحوليات باشراف وتنظيم الجمعية الوطنية لمربي الأغنام والماعز. هاد البطولة ديال الصردي اللي ربح فيها كيتأهل للفينال فمعرض مكناس الدولي للفلاحة اللي كيكون كل عام بمكناس.

لخيام مخلطة مع الطونوبيلات والكاميوات حولات هاد المساحة لكبيرة التابعة لوزارة الفلاحة لعيد لعرس سلطانو هو الصردي. باش العرس يكون على قوامو خاصو يبدا بفطور فالخيمات. الخير موجود فهاد صبحية ديال لخميس 5 فيراير. قبل ما تعطى السونتر ملاك هاد النوع الجميل من لحوالا والحوليات كيفطرو بالشيار مع الزبدة ولعسل وشي مخلطو مع زيت العود وطبعا اتاي. ما يمكنش يكمل فطور بحال هادا بلا حريرة والشفنج. طبعا هاد الناس ما مفرطينش فتقاليدهم فالماكلة ولكن عايشين مع الوقت. عليها حضرات حتى الكرواصا فيه.

غير شبعات الكرش فهاد النهار الصباحي اللي ما صباتش فيه الشتا وبدات الخدمة.

هنا الملاك فيهم صحاب الجلالب وفيهم اللي جاي ضارب حطات عصرية. كلشي طالياني من الكاسيطة “گوتشي” حتى النظاظر والسباط. عادي هاد العلاقة بين الطاليان وبين الصردي. هادا النوع من لغنم اصلها ايطالي من جزيرة صاردينيا عليها بقى عندها الاسم. كاين مغاربة دارو خبرة جينية من سكان المنطقة وطلع عندهم نسبة من جينات هاد المنطقة الايطالية حسب اكد ل”كود” احدهم “طلع عندي 7 بالمائة من ساردينيا”.

اليوم كاين عدد من عائلات مربي الصردي نعجات وحوالا عايش فايطاليا “الناس كتعتاقد باللي ممكن تعيش بالصردي بوحدو. راه المربين كيعانيو. كون ما عندهمش خدمة اخرى ما عندهمش باش يعيشو” يشرح ل”كود” واحد من عائلة كبار المربين. واضاف “هاد الشي راه قلناه لوزير الفلاحة باش تلاقينا بيه. قلناه للمسؤولين”.

عليها كاينة مبادرات باش يتعطى اشعاع لهاد الحولي. امحمد بونافع من عائلة معروفة بتربية هاد السلالة خدام على مشروع “دار الصردي”. تكون فضاء تتحول لوجهة سياحية داخلية وخارجية. قربها من مدخل ومخرج لوطوروت كازا سطات “ولاد عبو”، غادي يعاون الفكرة المشروع. بونافع عندو فكرة واضحة حتى على البلاصة اللي يكون فيها وهي نفس لبلاصة اللي كيتنظم فيها هاد الحدث بضيعة لقراقرة بدائرة لبروج باقليم سطات.

فانتظار تخرج هاد الفكرة باش تسوق اكثر لهاد السلالة وتعاون مربيها، نرجعو للعراسية.

بعد ما فطر اللي حضر ولفطور راه مفتوح لكلشي. للي حضر ياكل، بدات عملية الانتقام والوشم. خلال 3 ايام قدم فيها 80 كساب كثر من 6 الاف حولية والفين حولي من هاد السلالة. لكن كيفاش كدار عملتي الوشم والانتقاء.

عملية الانتقاء كدار على 2 مراحل. كتعتمد على لقياس. عاد تقييم السلالة بطريقة واضحة ومنظمة. فالمرحلة اللولى كتهم لقياس. فيها كيختارو تقنيون مختصين تابعين للجمعية وفق مقاييس واضحة الحولي ماشي الحولية. فيها كيعبرو الطول والعرض ولعلو. كيف تابعات “كود” كيستخدمو التقنيين اليات للقياس قدام كلشي. الشفافية. من بعد كيتسجل كاع المعلومات فطالبيت. ما كاين لا وراق لا ستيلو.

كتكون فما يشبه زريبة وبحضور الناس. اللي بغى يحضر يحضر.

عاد كتجي المرحلة الثانية فعملية الانتقاء وهي “التقييم” . فيها كيعطيو لكل قياس نقطة. بحال شي مسابقة ديال اختيار ملكة جمال كيبداو يشفو الجمال بشكل عام وكيركزو على اهم خصائص هاد السلالة وهي “لكحولية اللي كتبان فالعينين ولكحولية تحت الرجلين ولكمامة اي جهة الفم.

لكن كيفاش كيعرفو باللي هاد الصردي واعر على لاخر؟ كاين درجات كيف شرح ل”كود” احد المربين وكيف عايناتها فهاد النهار، احسن انواع الصردي هي الدرجة الممتازة. باش شي كساب يحصل عليها خاص الحولي يجيب ما بين 93 و100 نقطة. فهاد النهار عدد كبير من الحوالا جابها.

عاد الدرجة الاولى اللي كيجيب فيها ما بين 80 و92 نقطة وكتجي اخيرا الدرجة الثانية وفيها كيجيب ما بين 79 نقطة و65 نقطة.

فهاد العملية كيدوز حولي بحولي. حولية بحولية. كساب بكساب. عليها كدار ف3 ايام.

طبعا ما كاينش غير اختيار الحولي والحولية. من بعد كاين سوق فيها البيع والشرا. سوق الدلالة ديال الحولي لفحل. العملية كتبدا بعرض الكساب لعدد من لحوالا وحتى الحوليات. السوق اللي كيحدد الثمن.

فعملية حضراتها “كود” لواحد الكساب معروف كان ربح شي جائزة فمعرض باريس، عرض بصردي فحل للبيع. دارو بيه الشراية مع شي وحدين خدمتهم غير يحاولو يقربو بين الجوج. دلالة ما صالحين لوالو. صفرت الصفارة واللي تقدم عطى 8 الاف درهم. در عليه مول الصردي ب30 الف درهم. شد لي نقطع ليك سالاو البيعة والشرية ب20 الف درهم.

طبعا هادا الصدري لفحل هو منقذ السلالة مع الحوليات. كل صردي من هاد النوع يكون مع الحوليات. خدمتو “يضرب” هاد الحوليات. غالبا هاد النوع كيكون فالزريبة فالدار. يعلف ويشرب وممكن، حسب احد المربين ل”كود”، يطرگ حتى 10 الحوليات. يعطيهم جيناتو اللي تخلط مع جينات الحوليات وتعطي سلالة ماشي غير فخر بني مسكين بل فخر بلاد كلها.