مصطفى لمزابي كود ابن احمد //
“كود” انطلاقا من شهادات ومعطيات كثيرة قدرات تقدم ليكم صورة على القصة الكاملة لبولحية المتهم الرئيسي دابا قضية سفاح حمداوا. كلشي بدا ليلة الاحد 20 ابريل 2025 بمدينة بن احمد فاقليم سطات. شخص مشى عند بوليس المداومة بدائرة الشرطة فالمدينة وقال ليهم باللي باش كان كيتوضى لصلاة لعصر فطواليط المسجد الاعظم فالمدينة شم ريحة خانزة. هاد الشي شمو هو وغيرو.
البوليس وصل للطواليط
دورية دالبوليس تنقلات للطواليط بعد كلام داك الشخص. من المعاينة الاولية عرفوها جريمة قتل. طوقو مكان الجريمة. حجزو اللباس وميكات البلاسيك ودارو فيها عظوما ديال بنادم مغطية بالجلد وللحم. لقاو موس كبير واخر متوسط. لقاو كذلك٬ وفق مصادر “كود”٬ بلاستيك اخر. المفاجئات ما سالاش. فلقوادس لقاو 19 قطعة من لحم بنادم. جابو الوقاية المدنية٬ يضيف احد الشهود ل”كود”٬ وفتحو لقوادس ولقاو فيها لمصارن وجزء من الكبدة والقلب والمخ وقطعة لحم.
بدات التحقيقات
هاد الشي كيخلع. بدات التحقيقات. سمعو للي كينظف الطواليط. قال ليهم باللي شي حوايج ديال بولحية. قاال باللي ديماا كيتردد على الطواليط ديال المسجد الاعظم. قال باللي كيخزن فيها حوايج ديالو. مشاو فتشو دار بولحية. لقاو جوج قراعي من الما قاطع وتلفونات ومبيد لحشرات وكارطات ديال البنك وميكات البلاستيك بحال اللي لقاوها فطواليط الجامع
فين الشهود
حسب ما علمته “كود” باللي الشاهد الاول قال باللي باش بغى يفتح طواليط الجامع لقاها مسدودة من الداخل. دق الباب ولقى بولحية وما بغاش يفتح. مشى عند البوليس خبرهم وجاو فتحوها. داو بولحية فاللول فاومبيلانس لمستشفى الأمراض النفسية والعقلية ببرشيد.
فالطواليط لقاو الدم فالارض. كان كيتقال باللي بولحية كيدبح لمشاش ولكلاب ويغسل الارض.
كان شاهد اخر واكتاشفو انو ماشي لحم لكلاب ولا لمشاش ولكن ديال بنادم
مقتول اخر
بدا البحث وبعد التحاليل اكتاشف المحققون باللي هاد الاشلاء ماشي ديال جثة وحدة ولكن ديال جوج جثت. لقااو ريحة خاايبة فارض فلاحية حدا دار بولحية. مشات الشرطة وجمعو ميكات فيها بنادم. تعرفو باللي كاينة جثة اخرى. لقاو ادلة جنائية فيها امنشار استعمل فالتقطيع بطاقة تعريف وطنية لمواطن اخر سميتو هشام لتكون المفاجأة. دارو ليه البصة لقاو سميتو ه . س
