كود – عثمان الشرقي //

عرفات الساحة الفنية الأمازيغية فالأيام الأخيرة وجه جديد، بعدما التحقات الفنانة الصاعدة ”نسرين باربي“ بفرقة الفنان الأمازيغي لحسن لخنيفري، فخطوة اللي اعتبروها بزاف ديال المتتبعين بداية مسار فني واعد للفنانة الشابة.

وبانت” نسرين باربي“فأول ظهور فني لها رفقة الفرقة خلال سهرة فنية تْميّزات بحضور جماهيري مهم بمدينة أزرو فين لقات تجاوب كبير مع الحاضرين اللي تفاعلو مع أدائها ومع الأجواء اللي طبعات الحفل, الشي لي خلا الحسن الخنيفري يديها معاه لجولاتو الفنية عبر ربوع المملكة .

وحسب مصادر قريبة من الفرقة ”لگود“، فاختيار نسرين باربي باش تكون ضمن المجموعة جا بعد إعجاب الفنان لحسن لخنيفري بأدائها، خصوصاً فالأغاني التراثية اللي كتحتاج حضور قوي فوق الخشبة ، الفنانة كتميز بالطول والقلدة الشي لي كيمكنها من تواصل بصري قوي مع الجمهور وبالتالي سهولة رصد الغرامة فين كاينة .

السّهرة الأولى ديال” نسرين باربي“ مع الفرقة دازت فجو احتفالي، وعرفات لحظات تفاعل كبيرة مع الجمهور اللي شجّع الفنانة الجديدة وصفّق لها بحرارة، الشي اللي عطا انطباع أولي إيجابي على قدرتها انها قادرة تفرض راسها فالساحة الفنية .

متتبعين كيشوفو أن انضمام “نسرين باربي“ لفرقة فنان بحجم لحسن لخنيفري ممكن يفتح ليها أبواب جديدة فالمجال الفني، خصوصاً مع الشعبية اللي كتحظى بها الفرقة وسط المغرب وخارجو.

السؤال لي كيطرحوه العديد من المتتبعين هو واش غادي تقدر ”نسرين باربي“ تفرض راسها فالمجموعة ودير بلاصتها أو انها انتدابها غادي يكون فقط مرحلي بينما ترجع ”الطبيبة هدى“ للميادين ؟ الأيام الجاية كفيلة باش تكشف مسار هاد التجربة الفنية الجديدة.