تم النشر في “گود” بعد موافقة شخصية من كاتبة الحلقات نهال المنصوري

الجزء الأول :

غنبداو بالأحدات لي عتارفو بيهم سعد و لورا و بعض الشهود يعني لي فيهم تطابق :
القصة و ما فيها أن سعد و لورا تلاقاو فملهى ليلي و شربو و شطحو و هضرو و ضحكو و تعاجبو. من بعد عرضها باش تمشي معاهم يكملو الحفلة مع صحابو و صحاباتو فملهى واحد آخر.
فالطريق قاليها بلي مابقاوش غاديين للملهى حيت مابغاوش يعطيوه الطبلة VIP لي بغا و بلي غادي يكملو السهرة كاملين فالغرفة ديال واحد من الأصدقاء ديالو ففندق l’Intercontinental. وافقات و بصح مشاو لهاد الغرفة كاملين و طلقو الموسيقى و شطحو و شربو و ضحكو و تعاودو. لحد الآن مازال ما كاين لا بوسان لا والو. سعد و واحد الصديقة كانت معاهم اعتارفو للقاضية بلي شمو الغبرة و بلي اقتارحو على لورا تشم معاهم ولكن مابغاتش.

من بعد لورا كاتقول بلي سعد اقتارح عليهم يمشيو يكملو السهرة فالغرفة ديالو ففندق Marriott حيت بغاو يجهدو مزال للموسيقى. هو قاليهم بلي الغرفة ديالو كبيرة و ليطاج ديالو كامل خاوي على ودو و غادي يقدرو ينشطو على راحتهم. لورا و جوج ديال الأصدقاء ديالو قالو واخا. لورا مشات مع سعد فطاكسي و جوج لخرين كانو غايجيو بوحدهم.
لورا و سعد وصلو للوطيل ديالو و دخلو للغرفة على أساس الأصدقاء ديال سعد غادي يخلطو عليهم. ولكن ماعمرهم جاو…
سعد قال أنها كاتكدب و بلي الأصدقاء ديالو ماكانوش غايمشيو معاهم.

(بيناتنا هادو لكلاسيكيات ديال الشاب المغربي لي نسا شي حاجة فالدار ولا خاص يبدل حوايجو ولا خاص يعطي الكلب ياكل… و كايقول للبنت يالله معايا ماتبقايش كاتسناي فالزنقة…تتعدد الوسائل و الهدف واحد)