كود الرباط//

قدم سمير كودار، رئيس قطب التنظيم، الحصيلة ديال الحزب فانتخابات البرلمان الأخيرة، خلال الدورة الاستثنائية للمجلس الوطني لحزب الأصالة والمعاصرة اللي تدارت فقصر المؤتمرات بالصخيرات، وكشف على مجموعة ديال المعطيات والأرقام اللي كتقيم هاد النتيجة.

وأكد كودار بلي الحصول على 97 مقعد برلماني ما جاش بسهولة، ولكن كان نتيجة ديال خدمة تنظيمية وميدانية دامت 15 شهر، كان فيها تحرك كبير وعمل متواصل فمختلف الجماعات والدوائر. وأوضح بلي هاد النتيجة تطلبات مجهود جبار من كاع أطر ومناضلي الحزب، وهو الشي اللي كيبين حجم التواجد الميداني.

وبخصوص التواجد النسوي، بين كودار بلي النساء كيشكلو 20% من مجموع المقاعد اللي جاب الحزب، أي ما يعادل 19 برلمانية. أما بالنسبة للوجوه الجديدة، فبلغات نسبة البرلمانيين الجدد 48.5%، بـ 47 برلماني جديد.

وأضاف رئيس قطب التنظيم بلي الحزب قدر يضمن مقعد فكل دائرة محلية فـ 7 ديال الجهات، الشي اللي كيبين الامتداد ديال الحزب فالمغرب. أما من ناحية أصوات الناخبين، فجاب البام 1,065,371 صوت فاللائحة الجهوية، و1,043,781 صوت فالدوائر المحلية.

هاد العرض جاء فأطوار الدورة الاستثنائية للمجلس الوطني، اللي تخصص جزء منها لتقييم النتائج والتفكير فالمراحل السياسية والتنظيمية الجاية.