كود الرباط//

العيد عند بعض السياسين والبرلمانيين مختلف، كولشي كيسول على الوزيعة الجديدة لي غاتكون فالهيكلة الجديدة لمجلس النواب، خصوصا مناصب لي عندها مكانة خاصة بحال نواب رئيس المجلس ورؤساء اللجان الدائمة.

وحسب مصادر “گود”، فإن تبادل التهاني بين البرلمانيين لم يخلوا من بعض الأسئلة المحرجة من قبيل شكون يجي بلاصت فلان فمنصب علان، خصوصا المناصب الكبيرة فثالث مؤسسة فهرم الدولة (مكتب مجلس النواب).

التسريبات ديال العيد كتقول بلي الحرب نايضة على هاد المناصب، وكاين للي تحسم اليوم، منها الهضرة للي دايرا بشكل قوي داخل الفريق الاستقلالي للي كيعيش أسوأ مراحل تاريخه خصوصا بعد فضيحة التسجيل المنسوب لرئيس الفريق نور الدين مضيان، وتوالي الفضائح التي وصلت للقضاء. بحيث اللي بان محسوم حاليا هو أن عمر احجيرة هو الاقرب لمنصب رئيس الفريق.

عبد الصمد قيوح، واحد من كبار أعيان فسوس، لي فشل يفرض اسمو ضمن الأسماء المقترحة للتعديل الحكومي، باغي يشد منصب النائب الثاني لرئيس مجلس النواب بلاصت خديجة الزومي، واخا أن الأخيرة تعتبر من أعمدة حزب الاستقلال وصعيب تنازل إلا بمنصب كبير مقابل هادشي وغالبا تعين سفيرة فأمريكا الثلاثينية.

أما بخصوص حزب الأصالة والمعاصرة، مازال كولشي قابل للتغيير في آخر لحظة، لكن المفاجأة هي أن صلاح الدين أبو الغالي هو واحد من القيادة الجماعية باغي رئاسة لجنة الداخلية بلاصت محمد ودمين المحسوب على الأمين العام السابق عبد اللطيف وهبي.

فالبام نيت، نفس الشيء بالنسبة لمنصب النائب لرئيس مجلس النواب اللي فيه محمد الصباري (أسرع نقيب للمحامين دوز 48 ساعة نقيبا لهيئة المحامين بمراكش وطاح دغيا بسبب مرافعاته لصالح الانفصاليين المعتقلين بالمغرب)، غاتجي بلاصتو نجوى كوكوس رئيسة المجلس الوطني للبام، واخا عندها مسار “فاشل” فالدبلوماسية البرلمانية وكولشي عارف الأخطاء لي دارت فالجزائر وكيفاش تحيدات من المكتب التنفيذي لمنظمة التعاون الإسلامي.

لكن الغريب فالبام هو أنه دغيا بدا يسرع فالمناصب اللي فيها التعويضات (مجلس النواب) في حين مزال مقدرش يدير تشكيل المكتب السياسي.

أما حزب الحركة الشعبية، فالمعارضة، كيف ديما كيسلكو راسهم وكيقادو الوزيعة بالتفاهمات وصداعهم قليل لي كيسمعو، الحزب حاليا فيه جوج أقطاب قويين، محمد أوزين اللي هو الأمين العام، وادريس السنتيسي القطب ديال التنظيم ورجال الأعمال والمكانة ديالو قوية فالبرلمان، خصوصا بعد سقوط الأعيان الكبار فالحزب من قبيل محمد مبدع المتابع على خلفية ملفات فساد مالي.

الاتحاد الاشتراكي باقي تالف، رئيس الفريق محمد شهيد ضاربها بسكتة، هو واحد من المحسوبين على ادريس لشكر، صمتو على فضيحة صفقات الدراسات يؤكد بلي مقادرش ياخد مبادرة ويحرر الفريق البرلماني من سلطة لشكر، فالمقابل كيكون نواب قادرين يترأسو الفريق ويعطيو نفس قوي للمعارضة الاتحادية.

بحال شهيد المعروف بلغة الخشب، ميصلحش يقود رئاسة فريق الاتحاد الاشتراكي بمجلس، يقول مصدر من المعارضة.

في المقابل حافظ فريق التقدم والاشتراكية على توازنه، خصوصا وأن رئيس الفريق رشيد حموني، غير محسوب على الأمين العام محمد بنبعد الله، كما أن حموني عندو بعض المواقف مختلفة عن بنبعد الله ويعتبر من الأصوات الرافضة للتنسيق مع عبد الإله بنكيران زعيم البي جي دي.

البي بي إس دبا فيه جوج ريوس كيتنافس على الشرعية السياسية والقوة الاقتراحية والتصريحات، بنبعد الله من جهة اللي دوز أربع ولايات على رأس الحزب، وبين وجه ابان على قدرة فالتواصل والنقاش والمعارضة بشكل مؤسساتي داخل البرلماني ودائم التواصل مع الصحافة