الرئيسية > featured > كنظن أن واحد من أعظم القرارات وأشجعها في تاريخ قطاع الصحة في المغرب طبعا من بعد تعميم الرعاية الصحية هو نقصان سنة دراسية للأطباء لمنعهم من معادلة الشهادة برا المغرب ولوقف نزيف الأطباء.. كل طبيب كتقريه الدولة كيتقام على المغاربة بكثر من مية مليون وفي اللخر فاش كيشد الشهادة كيهاجر باش يداوي جاكي إي ميشيل
25/02/2024 19:00 featured

كنظن أن واحد من أعظم القرارات وأشجعها في تاريخ قطاع الصحة في المغرب طبعا من بعد تعميم الرعاية الصحية هو نقصان سنة دراسية للأطباء لمنعهم من معادلة الشهادة برا المغرب ولوقف نزيف الأطباء.. كل طبيب كتقريه الدولة كيتقام على المغاربة بكثر من مية مليون وفي اللخر فاش كيشد الشهادة كيهاجر باش يداوي جاكي إي ميشيل

كنظن أن واحد من أعظم القرارات وأشجعها في تاريخ قطاع الصحة في المغرب طبعا من بعد تعميم الرعاية الصحية هو نقصان سنة دراسية للأطباء لمنعهم من معادلة الشهادة برا المغرب ولوقف نزيف الأطباء.. كل طبيب كتقريه الدولة كيتقام على المغاربة بكثر من مية مليون وفي اللخر فاش كيشد الشهادة كيهاجر باش يداوي جاكي إي ميشيل

محمد سقراط-كود///

كنظن أن واحد من أعظم القرارات وأشجعها في تاريخ قطاع الصحة في المغرب طبعا من بعد تعميم الرعاية الصحية هو نقصان سنة دراسية للأطباء لمنعهم من معادلة الشهادة برا المغرب ولوقف نزيف الأطباء، كل طبيب كتقريه الدولة كيتقام على المغاربة بكثر من مية مليون وفي اللخر فاش كيشد الشهادة كيهاجر لألمانيا وفرنسا وكندا وباقي الدول باش يستافدو من التكوين ديالو فابور ويستافد هو من تكوين المغرب ليه بلا مايقدم تاحاجة للبلاد، طبعا من حقهم يحتجوا ويديروا اضراب ويحاولو يبتزو الدولة ترضخ لمطالبهم والى قدرو الله يسهل عليهم، ولكن ليس من حقهم يكذبوا على المغاربة ويدعيو أنهم دايرين إضراب على ود الشعب، ومن أجل تكوين كامل للطبيب باش يداوي الشعب مزيان ويكتاسب معرفة ومهارة قبل ما يبدى التطبيب، علما أن القراية راه كتسالي في الخمس سنوات الأولى، والباقي تدريب وسطاج، يعني نقصان سنة دراسية ماغادي يأثر كاع على جودة الطبيب المتخرج.

واحد الدراسة نشراتها المجلة الأوروبية للصحة العامة وحطاتها لوموند كشفت دراسة إستقصائية تدارت على طلبة الطب في المغرب ف 2021 أن سبعين في المية منهم يعتزم مغادرة المغرب بعد إكمال الدراسة، وفي 2017 أشار المجلس الوطني لنقابة أطباء فرنسا أنهم سجلوا 1200 طبيب مغربي في السيستيم ديالهم، راه هذا إستعمار جديد وإستغلال لخيرات وثروات البلاد بلا مايحتاجوا جيش للغزو والإحتلال، بلاد فقيرة بحال المغرب الناتج الداخلي الخام ديالها كلو يالله تلقاه واصل لشركة فرنسية وماواصلش حتى لثروة شخصية قد ديال بيرنارد آرنو، أي واحد قراه المغرب وكبرو خاص يتمنع يهاجر من المغرب حتى يرد لخزينة المغرب تكاليف الدراسة ديالو، طبعا من غيرنا حنا صحاب الهدر المدرسي حيت حنا أصلا حاصلين هنا والهجرة غير متاحة لينا بحال القاريين يعني الدولة معندها مناش تخاف بالاظافة إلى أننا حتى إلى هاجرنا كنخليو من ورانا أسر فقيرة خاصنا نعاونوهم ونرسلو ليهم الأورو كل شهر لي كينعش خزينة الدولة بالعملة الصعبة، وكنشريو ديور في البلاد إر بلوس 2 وكنروجوا الاقتصاد، على عكس الأطباء والقاريين لي واليديهم ممحتاجينش ليهم وفاش كيهاجروا كيندامجوا دغية في بلاد المهجر وكاين منهم لي كيولي فرنسي كثر من الفرنسيين وكياخد جنسية وكيصوت على اليمين الفرنسي ومكيسيفط حتى ريال للبلاد وكيقطع علاقتوا بيها أصلا حيت هو من اللول كان كيحس براسو فرنسي تزاد في البلاد الغلط بحال سهام البارودي من غير قرعة دالعسل وباكية دالقهوة في العام كتجيبهم معاها للمغرب مكتستافد منها البلاد والو.

أي واحد خرج للتظاهر أو دار إضراب وإدعى أنه كيدافع على مصالح الشعب راه كذاب وكيدافع غير على مصلحتو الشخصية، الوحيد لي كيدافع على مصالح الشعب هو الملك ، أما باش يخرج طالب طب ويبدى يتظاهر بخوفه على صحة المغاربة وهوما ثلث الأطباء المتخرجين من المغرب كيهاجر للخارج، والباقي متمركزين بين الرباط وكازا ، وباقي مناطق المغرب ليها الله مكيبغيوش الأطباء يمشيو ليها، الناس كتجي من تارودانت كتقطع أعلى سلسلة جبال في المغرب باش تداوى في مراكش وكاين لي بعد كاع، فاش في اللخر يخرج طالب طب يقوليك راه خايف على صحة المغاربة من عام ديال السطاج ناقص، راه هذا هو أعظم قرار خداتوا الحكومة المغربية ومكرهناش يتعمم في كاع المجالات، كاع لي عند وشي شهادة ديال مدرسة عليا في المغرب يريح معانا هنا حتى يرد لينا فلوسنا عاد يمشي الى بغا، يخليو غير صحاب الهدر المدرسي  يهاجروا وصحاب الأدب العربي والشعر والتعليم الأصيل وخريجي كلية الشريعة هادوك تشوف الدولة كي تدير تصدرهم وتوفر ليهم وسائل الهجرة ماشي العكس.

 

 

موضوعات أخرى

22/04/2024 07:00

قاضي التحقيق بابتدائية سطات هبط موظف سجن عين علي مومن الحبس وها التهم للي توجهات ليه