محمد سقراط-كود///
السيمانة لي فاتت حكمو على داك خناق التلميذات في طنجة لي كان كيخنق البنات ويكريسيهم فبير شيفا ب 12 عام ديال الحبس، الصراحة كان من أجل الأخبار لي سمعت هادي مدة، لأنه ماشي مجرم عادي ولكن مجرم حكار وبزاف، بنت كتقرى في الإعدادي في حي شعبي آش غيكون عندها كاع تيليفون على قد الحال ولي مرفحة تكون هازة شي خمسين درهم ، راه هادو غير تلميذات ومع ذلك كان كيتربص بيهم يوميا وكان مروع واحد القنت وعندو ضحايا، ولكن بفضل الكاميرات المنزلية لي دايرينها الناس في ديورهم أو أمام المحلات نتاوعهم قدرو يتعرفوا عليه البوليس وبداو يقلبوا حتى شدوه معطلوهش، وراه تحكم حاليا ب12، ولولا كاميرات المراقبة المنزلية كان صعيب يتم التعرف عليه أو على الأقل كان غادي يبقى يكريسي حتى يطيب عاد يتشد لأنه مجهول.
كنظن أن الدولة خاص تطلق مبادرة بحال ديال التنمية البشرية ولكن هادي خاصة بالحضية سميتها المبادرة الوطنية للمراقبة الشاملة للمغاربة وأي واحد خالف القانون يتم التعرف عليه ويتشد، وتكون هاد المبادرة على شكل أن الدولة تتكفل بخمسين في المية من المصاريف ديال أي واحد بغا يدير الكاميرات في دارو، وطبعا وزارة الداخلية هي لي تسهر على هاد المبادرة، والناس لي بغى يستافد يدير الدوفي ديالو ويدفع لأقرب قيادة وهوما يراجعوا معاه ويشوفوا واش نافخ فيه أو لا وشحال من كامرة حقيقة محتاج ويسيفطو معاه شي خبير في الحضية مقدم نيت باش يراجع معاه الدوفي لي قدم ، وفي اللخر يتافقوا على عدد الكاميرات والزاوايا وخاص يرطبهم عاد يستافد من الدعم.
وبجكم أن الكاميرات حاليا يمكن تابعهم بتطبيق وتفرج مباشرة شنو كيوقع غير من التيليفون، فراه حق الولوج عبر التطبيق للكاميرات خاصو يتعطى حتى للمقدم ولرجال الشرطة أو الدرك حيت راه شاركين معاك بالنص، وهنا غادي يلقى راسو المقدم غير من التيليفون وللى كيعيش التجربة بحجال الى راه في مبنى جي إدغار هوفر ، مراقب كولشي وعلى القرص، حيت حاليا جزء كبير من عمل رجال الأمن أصبح مرتبط بكاميرات المراقبة، والألاف ديال الشفارة كيطيحو غير بسباب الكاميرات، لدرجة كاين لي كيشريهم قدام وخاسرين ويديرهم قبالة المحال كفزاعة فقط بقوة الفعالية ديالهم في طرد الشمكارة والمجرمين، في كوريا دايرين تجربة مشابهة ولكن مع الطوموبيلات، كاين لي كيعمر طوموبيلتو بالكاميرات وفاش كيصور شي حد دار مخالفة كيصورو ويسيفطها للبوليس وكيعطيو مكافئة مادية، الصراحة حتى هادي فكرة مزيانة خاص تطبق من بعد أما حاليا يبداو بعدا في دعم كاميرات المراقبة المنزلية.
