كود طنجة//
تمكنت عناصر الشرطة ديال الدائرة الأمنية العاشرة فمنطقة بني مكادة، أخيرا، من توقيف واحد الشخص معروف عندهم وعندو سوابق، بعدما تشد متلبس فحيازة وترويج المخدرات والمؤثرات العقلية.
وجرات هاد العملية فحي “بلاصاطورو” فطنجة، حيث شداتو الشرطة وبداو التفتيش، ولقاو عندو كمية كبيرة من الأقراص المهلوسة وصلات لـ 541 قرص، منها 411 حبة ديال الإكستازي و 130 قرص طبي مخدّر من نوع ريفوتريل.
وماشي غير هاد الشي، حتى 108 غرام ديال الشيرا و 38 غرام من الكوكايين كانت فحوزتو، وزيد عليها هواتف نقالة، جوج موازين إلكترونية، وسلاح أبيض كيستعملو فتجارتو غير المشروعة.
تنقيطو فقاعدة بيانات الأمن الوطني بين أنه مطلوب فجوج مذكرات بحث وطنية صادرة من طرف الشرطة القضائية بطنجة، على خلفية تهم مرتبطة بترويج المخدرات، وزيد عليها قضايا ديال الضرب والجرح الخطير.
ومن بعدما تحط المشتبه فيه تحت تدبير الحراسة النظرية فالبحث القضائي بإشراف النيابة العامة المختصة، تم تقديمو للعدالة باش تتم محاكمتو على المنسوب ليه من جرائم.
