كود -كازا //

زراعة القنب الهندي القانونية فـالريف ولات مكسيرية، حيث فـ2025 تزاد الإنتاج بنسبة 47.57% ووصل لـ2804 قنطار، مقارنة مع 1900 قنطار فـ2024، حسب معطيات رسمية.

هاد التطور كيبين باللي المساحات المزروعة غادا وكتكبر وعدد الفلاحة اللي داخلين فهاد النشاط القانوني كيزيد، خصوصاً من بعد ما بدا تطبيق قانون الاستعمالات المشروعة للقنب الهندي.

فـ2023، الإنتاج ما كانش فايت 60 قنطار، وهي السنة اللي كانت فيها الانطلاقة الحقيقية لهاذ النشاط بصيغتو القانونية، ومن بعدها بدا كيكبر دغيا فالعامين اللي وراها.

فـ2025، المساحة اللي تحصدات وصلت لـ844 هكتار، منهم 774 هكتار من الصنف المحلي “البلدية”، و70 هكتار من أنواع مستوردة.

أما مجموع المساحات المزروعة وصل 1387 هكتار، منها 1289 هكتار من الصنف المحلي، و98 هكتار من أصناف جاية من برا.

الصنف المحلي “البلدية” هو اللي مسيطر على أغلب الإنتاج والمساحات، حيث عليه طلب كبير عليه سوا فالمجال الطبي ولا الصناعي ولا التجميلي، وحتى فالسوق الخارجية.

والتعاونيات المحلية كتعوّل على موسم 2026 باش يزيد الإنتاج ويتحسّن المدخول، خصوصاً مع توسع وحدات التحويل والتصنيع المرتبطة بهاد الزراعة.