الرئيسية > آش واقع > كليات بداو يوجدو للامتحانات ولونصاو تاريخها والطلبة مافهمو والو: مازال مابدينا حتى لقرايا !
20/01/2021 19:50 آش واقع

كليات بداو يوجدو للامتحانات ولونصاو تاريخها والطلبة مافهمو والو: مازال مابدينا حتى لقرايا !

كليات بداو يوجدو للامتحانات ولونصاو تاريخها والطلبة مافهمو والو: مازال مابدينا حتى لقرايا !

كود كازا//

جوج كليات على الأقل لونصاو تاريخ الامتحانات الخريفية هذ العام فزمان كورونا، والأمر كيتعلق على سبيل المثال لا الحصر بكلية القانون التابعة لجامعة محمد الخامس بالرباط، وكلية العلوم والتقنيات التابعة لجامعة عبد المالك السعدي بطنجة.

كلية القانون أكَدال فالرباط دارت إعلان فالصفحة ديالها الرسمية، كتتكلم فيها على بداية الامتحانات الخريفية الخاصة بشهر 3 و5 ف10 فبراير 2021، و18 فبراير بالنسبة للفصل الأول.

بزاف ديال الطلبة فالتعليقات استنكرو هذشي، ورفضو هذ القرار وقالو أن مجموعة من الأساتذة مازال حتى ماعطاوهم راس الخيط فالدروس، وكاين اللي مازال مادار معاهم حتى حصة.

أما كلية طنجة، فعلنات أن الامتحانات غتكون حضورية ابتداء من 8 فبراير 2021، الشيء اللي خلا مجموعة من الطلبة يستنكرو، ويطالبو باش تكون الامتحانات عن بعد، حيت غيتكرفصو بزاف الناس اللي بعاد وماعندهم فين يباتو بسباب إغلاق الأحياء الجامعية.

ولحد الساعة، أغلبية الكليات مازال ماعلنو على الامتحانات، ومازال ماكاين قرار رسمي من قطاع التعليم العالي بوزارة التربية الوطنية على كيفاش خاص تكون الامتحانات الجامعية هذ العام، والإجراءات اللي خصها تدار، وكيفاش خاصها تكون، مع دخول السلالة الجديدة دكورونا للمغرب.

موضوعات أخرى