الرئيسية > آراء > كلشي مقدر الدور المهم لي كايلعبوه الاطباء و الاطر الصحية فهاد الظرفية الحاسمة ! و كلشي عارف الخطورة لي كايتعرضو ليها و لكن ماخاصناش نزيدو فيه بشي مطالب غير معقولة فحال تخصيص اوطيل للاطباء! راه سبانيا لي وصلو فيها الحالات لاكثر من ثلاتين الف و الاطباء مقاتلين كايأديو الواجب ديالهم !
25/03/2020 17:00 آراء

كلشي مقدر الدور المهم لي كايلعبوه الاطباء و الاطر الصحية فهاد الظرفية الحاسمة ! و كلشي عارف الخطورة لي كايتعرضو ليها و لكن ماخاصناش نزيدو فيه بشي مطالب غير معقولة فحال تخصيص اوطيل للاطباء! راه سبانيا لي وصلو فيها الحالات لاكثر من ثلاتين الف و الاطباء مقاتلين كايأديو الواجب ديالهم !

كلشي مقدر الدور المهم لي كايلعبوه الاطباء و الاطر الصحية فهاد الظرفية الحاسمة ! و كلشي عارف الخطورة لي كايتعرضو ليها و لكن ماخاصناش نزيدو فيه بشي مطالب غير معقولة فحال تخصيص اوطيل للاطباء! راه سبانيا لي وصلو فيها الحالات لاكثر من ثلاتين الف و الاطباء مقاتلين كايأديو الواجب ديالهم !

سهام البارودي – كود//

اولا خلينا نتافقو انه كلشي عارف بلي الدور ديال الطبيب مهم بزاف فهاد الظرفية و بلي كايتعرض لخطورة كبيرة و ضغط كبير فهاد الفترة !

و لكن خلينا نتافقو عاوتاني بلي هادشي طبيعي يكون فمهنة الطب! حيت هاد الفترة استثنائية ! و حنا كانواجهو وباء عالمي ! اذن من العادي جدا انه تتزاد الخدمة على الطبيب و تتزاد الخطورة و الضغط و لكن هادشي راه ماكايجعلش من خدمة الطبيب “بليزير منو” او ” كايمن علينا بيها ” بالعكس راه خدمتو هاديك كايتخلص عليها و كايشد عليها صالير فحالو فحال العسكري فحال المعلم فحال القايد. و نهار قرر يديرها كان عارف گاع المخاطر و الصعوبات لي يمكن تواجهو فيها و كان عارف بالخصوص الظروف لي كاتتمارس فيها المهنة فالمغرب و بالتالي حتى ديك الهضرة ديال سبانيا عندهم و حنا ماعندناش و الطاليان كايتخلصو بكدا و حنا كانتخلصو بكدا و التجهيزات و الصالير و و و هادشي كلو اليوم ماعندو تا معنى حيت نهار قرر الطبيب يدير الطب فالمغرب تاواحد ماكان مخبي عليه هادشي كلشي كان فخبارو و الاهم تاواحد ماضربو على يدو!

فحال واحد لي ختار يكون عسكري و مشا دوز الكونكور و فرح فاش تقبل و فرح بزاف نهار لبس اللبسة ! و فرح بزاف عاوتاني فاش شاف العسكر كايضربو ليه السلام ! كان عارف انه المهنة ديالو كاتحتم عليه يخدم فحالة الحرب و يتحارب و يقدر تجي فيه شي رصاصة و لا قنبولة و يمرض و يتشل و لا يموت گاع و يتيتمو ولادو و فحالة الحرب ماكانتسناوش منو يخرج يبكي علينا و لا يشكي و لا يقولينا عييت بقدر ماكانتسناو منو يوقف راجل و حسكة و يدافع على البلاد!

اليوم المغرب فيه 143 حالة مصابة بفيروس كوفيد 19، و هاد الرقم راه قليل بالمقارنة مع دول قريبة لينا و لكن ماخاصناش ننساو بلي راه مرشح للارتفاع فالاسابيع الجاية ! يعني فحالا بغيتي تقول حنا مازال مادخلنا للسطاج د الوحش فحال فرانسا و سبانيا ! سبانيا لي الحالات فيها وصلو لاكثر من ثلاتين الف مصاب و لي تاهي الاطباء و الممرضين ديالها خدامين على قدم و ساق و ماسمعناهمش كايطالبو بأوطيل فين ينعسو!

ثم انه فهاد الظرفية الاستثنائية راه كلشي معبئ و خدام ماشي غير الاطباء ! القياد مثلا راه شفناهم ففم المدفع ! خارجين للزناقي و كايتقاتلو باش يوعيو عباد الله و يحميو المواطن ! سيدة فحال القايدة حرية كاتخدم اكثر من ربعطاشر ساعة فالنهار وسط المواطنين ! واقفة على رجل وحدة! معرضة للخطر ديال المرض و الخطر ديال الجريمة و قلة الوعي … و تاهي تقدر تمرض و تمرض ولادها و عائلتها!شفنا العسكر ، البوليس، الجادارمية، رجال السلطة من جميع الرتب و ماننساوش حتى الناس لي ماتاحتش ليهم الفرصة باش يجلسو يخدمو من ديورهم و مضطرين كل نهار يخرجو و يعرضو حياتهم للخطر! كلشي خدام ! كلشي معرض للخطر ! كلشي واعي بالدور ديالو و بالواجب ديالو.

كيما كنتي فرحان نهار نجحتي فالكونكور مورا الباكو كيما كنتي فرحان نهار اديتي القسم و كليتي الحلوة ديال السوطنونص
و كيما كاتفرح فاش كايعيطو ليك فالعائلة دوكتور فلان و لا سي الطبيب

اليوم محتاجين اكثر من اي وقت اننا نشوفو اطباءنا أقوياء ! صامدين ! صابرين و خدامين معانا باش نحاربو هاد الوباء ! قطاع الصحة مقودة عليه !بزاف د الناس لاسولتيهم على تجربتهم فالسبيطارات و لا الكلينيكات غايقوليك الله يخليها سلعة !
و اليوم راها فرصة لهاد الاطباء باش يتصالحو مع الناس و يحسنو من صورة القطاع لي ديجا مهزوزة.

 

موضوعات أخرى

04/04/2020 07:00

هادي كتحسب ليها.. فعز أزمة كورونا الجامعة صرفت منحة الشطر الثالث وجميع الأندية غادي توصل بالفلوس نهار الاثنين وها علاش حيدات فلوس النزاعات