كود -وكالات//

كلب صگع سميتو “تشوتؤ”، من فصيلة “بوردر كولي”، عندو 8 سنين وكيتابعوه كثر من مليون ونص واحد على منصة “دويين” الصينية، اللي هي النسخة المحلية ديال تيك توك، مولاه كان مؤثر معروف فمجال السفر، خلاه عند والديه فالفيرمة ملي كان مسافر.

كاميرات المراقبة وثقات نهار 11 ماي راجل ومرا راكبين فوق موطور ديال ضو وهما كيسرقو الكلب من الفيرمة، العائلة بلغات البوليس مباشرة وعرضات مكافأة مالية لأي واحد يلقى الكلب ويرجعو.

من بعد ما رجع مول الكلب من السفر، قدر يوصل للشفارة، واعترف الكوبل بلي كانو كيحساب ليهم الكلب خلوي، وباعوه غير بـ 180 يوان صيني، يعني 26 دولار أمريكي.

وحسب المعطيات، الكلب وصل عند مول مطعم لي طيبو لكليان ديالو، وكتفيد التقارير أن القيمة الحقيقية ديالو كانت كتفوت 10 آلاف دولار.

دابا مول الكلب، يتابع الكوبل قانونياً وكيطالب بتعويضات كبيرة، وجات هاد القضية فوسط نقاش متواصل فالصين على حماية الحيوانات الأليفة، خصوصاً وأن البلاد ما عندهاش قانون وطني كايمنع ماكلة لحم الكلاب، وما كاينش تشريع خاص بحماية حيوانات الرفقة على المستوى الوطني.