وكالات//

صورات واحد الكاميرا ديال المراقبة مثبتة قدام واحد العيادة بيطرية في مدينة إسطمبول التركية واحد الحادثة غريبة ونادرة ومكانش يتيقها شي واحد كون ما تصوراتش.

وبينات هاد الكاميرا اللحظة لي هزات فيها واحد الكلبة الجرو ديالها المريض ودارتو قدام هاد العيادة باش على الله يعالجوه ليها ويفلت من الموت، خاصة أنه كان مات ليها واحد جرو آخر.

وكيبين هاد الفيديو المؤثر اللحظة لي جات فيها الكلبة قبل مايردو ليها الخدامة البال وبالصح دخلوه وعالجوه من المرض لي كان بسبابو في حالة صعيبة بزاف.

وسائل إعلام محلية، قالت إن الجرو مزال في العيادة المجهزة بقسم عناية مركزة، من نهار الاثنين لي فات، في الوقت لي الكلبة ماخرجاتش كاع من العيادة من نهار جابت الجرو ديالها وكتسنا يخرج منها.