كود سبور//

خلق الناخب الوطني وليد الركراكي، جدل كبير تاني بالتصريحات ديالو وهذه المرة خلال ندوة الإعلان على لاعبين المنتخب استعدادا لمواجهة كل من تونس والبنين وديا، وكاين اللي غايشوفها تصريحات فيها ثقة زايدة ولا غرور وتقدر تؤثر على مسار المنتخب المغربي فكوب دافريك 2025.

وجوابا على الهضرة اللي كاتخرج كل مرة حول المستقبل ديالو واش غايبقى ولا غايكمل مع المنتخب المغربي، هضر الركراكي وقال: “إلى كان شي حد احسن مني باش يدي هاد كأس إفريقيا، أنا نخلي هاد البوسط حيث اللي كايهمني أنا هو المغرب يربح وأنا هو أول مشجع للمنتخب راني بغيت نشوف حكيمي كايدي الكأس”.

وكمل الركراكي: “إلى كاينين شي وحدين كايبان لهم أن گوارديولا إلى جا غايدي لينا كأس إفريقيا ولا أنشيلوتي ولا كلوب ولا شي مدرب آخر، راه نگلس قدامو ونگولو الله يحفظك غير جيب لينا هاد كوب دافريك ولكن أنا قادر عليها بلاما تجيبو هذا المدرب اللي كاتقولو وكون ما كنتش قادر عليها كون مشيت بحالي راه ما غاتلقاوش احسن مني باش تربحو هاد لاكوب دافريك بغيتو ولا ما بغيتوش”.

وأكد الركراكي: “أنا مغربي هادي أول حاجة وما غاتلقاوش اللي يبغي البلاد اكثر مني، وإلى واحد اخرى كايبغي اللي عندو العينين زرقين وغايرتاح فالكنابي ديالو حيث شاف واحد گاوري يجيبو ماشي مشكل، وأنا ورايا الدراري باغيين يخدمو ويتقاتلو وكون ما حسيتش بهذا الشي كون مشيت بحالي والرئيس عارف هذا الشي وما كاينش احسن منو ويتحمل المسؤولية وإلى خلاني خدام من ورا لاكوب دافريك هو عارف شنو كانعطيو وغانديرو الجهد ديالنا وغانموتو فلاكوب دافريك باش نفرحو المغاربة”.