سهام البارودي – كود//

ككل عام ! و فراس العام بالضبط ! ضروري مايخرجو أعداء الفرح و السعادة باش يحرروا العيشة على راسهم و على عباد الله و يبارطاجيو دوك المنشورات فوسائل التواصل الاجتماعي لي كايبينو انهم ضد الاحتفال برأس السنة الميلادية!

و ماكاين غير ” أنا لا أحتفل بأعياد النصارى”
” أنا مسلم و لا اعرف سوى العيد الصغير و العيد الكبير”…تايصومو معانا عاد نعيدو معاهم ” هههه و فحال هاد المنشورات البهلوانية !

الإنسان عدو ما يجهله !
هادشي علاش قبل ماتكمل القراية غادي نحاربو شوية الأمية :
الكريسمس كايحتافلو بيه ليلة 24-25 ديسومبر و من غير الطبقة المخملية و بعض المسيحيين المغاربة تاواحد من المروك ماكايعرفو ! الكريسمس هوا عيد ميلاد المسيح و هوا لي سميتو ( نويل ) بالفرنسية! كاياكلو فيه كبد البط ( الفواگرا)  و لاداند و لابيش و ماتيسر من المشروبات الروحانية. و كانعاود نقوليك ” المغاربة عامة مامايعرفوهش)

راس العام او الريفيون : ماعيد ديني ماتاخرية ! كايحتافلو بيه الناس من العالم كامل فآخر ليلة من السنة ( 31 ديسمبر)  و هاد راس العام هوا لي كايعرفو المغاربة ! و لي حتى من شعيبة كايحتافل بيه بالحلوة و الموناضا مع ولادو و لا بالسكاراتي فالبياتاتي مع صاحبتو ! و راس العام لي كانكتبو بيه التواريخ فالادارات و الوثائق و كانعيشو بيه حياتنا اليومية.

هاد العام بانت واحد المخبزة قالك مولاها ” لا يبيع الحلوى ديال رأس السنة” ! ا و التصويرة ديالو تبارطاجات فوسائل التواصل الاجتماعي و كثر عليها اللغط بين السلفيين و الخوانجية لي فرحو و ماقداتهم فرحة بهاد الفتح المبين و هاد الأخ لي برد ليهم الغدايد هههه صافي من هادي لفتح الاندلس ياك آ الخوت ؟! و بين ” الحداثيين” لي شي وحدين فيهم زادو نغزة فالتحياح هاد المرة و دغيا بغاو يلصقو للسيد فالتهم !

انا شخشيا كايجيني التحامل على مول المخبزة (بالرغم من الجها ديالو بالفرق بين الاعياد) من طرف بعض الحداثيين ماليه تا معنى و بالعكس شي مرات كايبانو براهش كايهضرو من فراغ و غا كايوزعو فالتهم على عباد الله و ماكاين غا ” عيطو لهادا على الحموشي” ” شوفو هذا داعشي” ” شوفو هذا ارهابي…”  !  لا سمحو ليا بالزربة ! باش تقوليا على بولحية متطرف ! اقصائي من حقك حيت هذا حكم قيمة نتا لي كاتعطيه و لكن ارهابي لا عاوتاني ! ارهابي راه كاينين مؤسسات فهاد البلاد كاتقول على فلان ارهابي و لا ماشي ارهابي سميتهم البوليس و القضاء ! داكشي علاش خاصكم تشورو شوية آ الدراري !

مول المخبزة من حقو يبيع و لا مايبيعش ! من ناحية الحرية راه حر يبيع لي بغا فالمحل ديالو !

و لكن ! هادشي ماكايمنعش اننا ناقشو السبب او الاسباب لي ورا هاد النوع من القرارات ! شنو لي غايخلي واحد مول المخبزة لي نورمالمو الهدف ديالو هوا البيعوشرا و الماكسيموم د الگرمومة انه يمتانع يبيع شي حاجة لي غاتجيب ليه الگرمومة ؟ فحال داك مول الحانوت لي ماكايبغيش يبيع الگارو حيت كايشوفو ” حرام ” و غايدخل على ولادو فلوس الحرام !

لي غايخليه ياخد هاد النوع د القرارات هوا القناعات ديالو الدينية و لي سوقو فيها مادام انا ماضرنيش بيها ! ماتبعيش آ خويا مناقص ! غير ماتجيش تفرع ليا زكي لابغيت نشري من بلاصة اخرى و نحتافل و ننشط !

لاماباعتش مخبزة بولحية الكيكة د راس العام عطا الله المخبازات الواعرات لي كايبيعو الحلوة د راس العام على حقهم و طريقهم نعام آ سيدي ! و لي مابغاش يحتافل لهلا يطيحو فكرشو ! و لي بغا يبكي فراس العام و يندب سوقو هاداك !

ولكن هادشي ماكايمنعش انه هاد النوع د القرارات كاتخبي غالبا عقلية جهولة فيها ريحة الاقصائية ، خصوصا انه راس العام ماشي عيد ديني ! راس العام ( لي كايحتافلو بيه المغاربة بالحلوة و المونادا ماشي هوا الكريسميس لي كايحتافلو بيه غير واحد الثلة من المجتمع  غالبا كاينتاميو للطبقة المخملية بالفوا گرا و ماتيسر من المشروبات الروحانية كيما فسرت الفوق.

راس العام راه عيد كايحتافل بيه العام كامل فالجابون و الگابون و سكوتلاندا و تونس و لبنان ! العالم كامل كايحتافل بنهاية سنة و بداية سنة جديدة ! هادي راه فترة فرح فالعالم كامل يا وجه الغبينة! الناس كايشدو العطل و كايمشيو يتجمعو مع العوائل ديالهم ياكلو و يشربو و يضحكو و يحيدو الستريس ديال الخدمة د العام كامل ! و كايشريو الكادويات لبعضايتهم فجو زوين ! فرح ! عائلي !  القضية ماعندها علاقة بالدين ! بالعكس هاد راس العام راه تحول لمناسبة لتحريك الاقتصاد كاينشط فيها البيعوشرا و السياحة …

بغيتي تحتافل تانتا مع العالم كامل في جو اخوي ! زوين ! و تعبر على انتماءك للانسانية مرحبا ! مابغيتيش لهلا ! توسامبلومو لهلا ! بلاش عليك ! واش حنا مخصوصين نكد ؟

لي مابغاش يحتافل يمشي يقود لدارو و يسد عليه و يسهط يخلي عباد الله تنشط و تفرح و تاكل الحلوة بلا مايكرع ليها الفر بديك الوصاية الخاوية !

و لي بغا يحتافل ! يحتافل مع راساتو و بوناني للجميع !