كود -وكالات//

علنات دولة الإمارات اليوم الثلاث 28 أبريل 2026، باللي غادي تنساحب رسمياً من منظمة أوبك ابتداءً من 1 ماي الجاي، هاد القرار وصفوه المحللين بأنه واحد من أكثر القرارات تأثير فـ تاريخ المنظمة من نهار تأسسات قبل أكثر من 60 عام.

الانسحاب ماكانش مفاجأة كبيرة، حيث المشاكل بين أبوظبي والرياض كانت كتزاد عام ورا عام، خصوصاً على حصص الإنتاج، وزيد عليها خلافات سياسية قوية فـالملف ديال اليمن. الإمارات، اللي وصلات الطاقة الإنتاجية ديالها لكتر من 5 مليون برميل فالنهار، كانت كتشوف باللي القيود ديال أوبك كتزيرها وكتخليها ضيع فمليارات الدولارات من المداخيل كل عام.

المحللين كيتوقعو هاد القرار غادي يضغط على الثمن ديال البترول وينقصو، خصوصاً فسوق فيه أصلاً فائض فالعرض وزيد عليها هاد الخطوة ممكن تهدد التحالف كامل ديال المنظمة فواحد المرحلة حساسة بزاف.

أوبك (منظمة الدول المصدّرة للبترول) تأسسات عام 1960، وكتجمع 12 دولة، أغلبهم عرب وأفارقة، وكتتحكم ف 40% من الإنتاج العالمي ديال البترول، الهدف ديالها هو تنسيق السياسات ديال الإنتاج بين الدول باش يأثرو على الثمن فالسوق العالمي.