كود – الرباط//

نفى مصدر مقرب من وزير العدل عبد اللطيف وهبي لـ”كود” يكون الوزير دار شي كسيدة فهاد العواشر، ولا كان صايگ وهو سكران ولا والو. هادشي كامل كذوب وخزعبلات كينشروها بعض اليوتوبر وصفحات فهاد العواشر، باش يجيبو المشاهدات على ظهر وهبي.

المصدر قال لـ”گود” إن وهبي ما دار حتى كسيدة، ومكيصوكش بوحدو السيارة، حيث عندو سائقين رسميين، خدامين معاه فالليل والنهار، والسيارة ديالو بحال كاع سيارات الوزراء كتخضع لبروتوكل ف التنظيف والانضباط، ويستحيل تكون البيرة فحال ديك الصورة للي روجو بعض الصفحات.

وهبي، حسب نفس المصدر، ما مسوقش لهاد الفايك وكيتعجب من المستوى لي وصلو ليه بعض “الناس لي عايشين من الفايك والفيديوهات المفبركة”، ولي كيطلقو التهم بلا تدقيق وتأكيد.

الغريب فالأمر، هو أن لي زاد روج هاد الفايك على وهبي، هو هشام جيراندو صاحب قناة تحدي لي دار فيديو اليوم كيهضر فيه على الكسيدة ديال وهبي وربطها بالسكرة .

جيراندو لي تحكم عليه غيابيا بخمس عشرة سنة سجنا نافذا بعد مؤاخذته بتهم “تكوين اتفاق إرهابي لإعداد وارتكاب أفعال إرهابية في إطار مشروع جماعي يهدف إلى المس الخطير بالنظام العام بواسطة التخويف والتهديد والترهيب، والتحريض وإقناع الغير بارتكاب أعمال إرهابية”، عايش ف كندا وهارب من العدالة  نشر صورتين لسيارة مجهولة دارت كسيدة، وزاد صورة فيها قنينة بيرة، فواحد التركيبة بايخة باش يوهم الناس أن الوزير كان سكران ودار حادثة. ولكن الحقيقة، الوزير بخير وما كاين لا كسيدة لا والو.

مصدر آخر كشف لـ”گود” بلي مسؤول فوزارة العدل كان دار شي كسيدة خفيفة مؤخرا ومافيها لا جروح ولاضرار، ومعندهاش علاقة لا بالصورة لي منشورة ولي هي أصلا قديمة.

وفنفس الوقت، وهبي كيشتغل مع فريقو فوزارة العدل باش يدخلو تعديلات جديدة على القانون الجنائي، من بينها تشديد العقوبات على مروجي الأخبار الزائفة، والناس اللي كيشيرو ف السوشل ميديا بلا دليل، وكيشوهو السمعة ديال المواطنين قدام الرأي العام.