كود كازا//

الطريق الإقليمية رقم 321 اللي كا تربط ما بين الطريق الوطنية رقم 1 (كازا–الجديدة) والطريق الجهوية الساحلية رقم 320 (كازا–أزمور)، عرفات صباح اليوم الأربعاء 19 نونبر، حادثة سير خطيرة بعدما تقلبات طوموبيل تابعة للأمن الوطني.

السيارة كانت فمهمة رسمية ف اتجاه سيدي رحال الشاطئ في إطار تقريب الإدارة من المواطنين وإنجاز البطائق الوطنية للساكنة، ولكن فواحد المنعرج خطير قرب “دوّار غولان” بجماعة السوالم الطريفية، فقد السائق السيطرة على السيارة، الشي اللي تقلب، ماشي بعيد على مركز سيدي رحال الشاطئ اللي تابع لنفوذ الدرك الملكي.

الحادثة خلفات إصابات متفاوتة الخطورة لجوج ديال موظفي الشرطة اللي كانو داخل الطوموبيل، وتنقلو بسيارة إسعاف ديال الوقاية المدنية وسيارة أخرى ديال الجماعة للمركز الصحي الحضري من المستوى الثاني فسيدي رحال باش يتعالجو.

عناصر الدرك الملكي فتحات تحقيق فهاد الكسيدة بتعليمات من النيابة العامة المختصة باش تعرف الأسباب وملابسات هاد الحادث الخطير.