كود ـ الرباط//
لا زالت تداعيات الكسيدة اللي ماتو فيها ربعة قرب الكاموني صباح الاحد الماضي، كتكشف على مفاجأت خطيرة.
مقرب من عائلة السائق اللي مات قال إن مسؤول كبير بالجماعة حلف لزوجة السائق أنهم فيقوا رئيس الجماعة فالربعة ديال الصباح باش يهضر مع مدير المصالح يعطيهم أمر بمهمة يدفعوه مع وثائق الحادثة لمصالح الدرك الملكي.
العائلة ديال السائق اللي بغات تسجل الكسيدة كحادثة شغل باش ولاد الضحية يستافدو، هددت نائب رئيس الجماعة اللي عطا الأوامر للسائق باش يرافق الخدامة ديال الشركة ديالو اللي كان عندها بون دو كوموند بجماعة في ضواحي مكناس لتنشيط فقرات لصالح أطفال الجماعة بكشف كل شيء إذا سجلت حادثة سير عادية .
السؤال هو شكون عطى الأوامر للشيفور يدي خدامة ديال شركة خاصة للتنشيط والماتريال ديال التنشيط فشاحنة الجماعة، واش رئيس مقاطعة العيايدة ولا رئيس جماعة سلا ولا مدير المصالح اللي كيقولوا أنه تعرض لضغوطات من نواب الرئيس ورئيس الجماعة بدرجة أقل باش يسني أمر بمهمة.
وحتا يلا سنى مدير المصالح أمر بمهمة بلاما نهضروا على التزوير وتوقيع وثيقة بأثر رجعي للتغطية على مخالفة قانونية واش من حق شركة خاصة ديال التنشيط الثقافي تنقل الخدامة ديالها على متن شاحنة مملوكة للجماعة؟ واش هاذ الشي فخبار عامل سلا اللي انتقل لموقع حادثة السير في ساعات مبكرة من صباح الأحد بعد ما ماتو ثلاثة شبان وسائق بجماعة سلا كانو جايين من مكناس اللي دوزوا فيها ربع يام؟.
https://www.facebook.com/share/p/zCAfooeuErbRHimg/?mibextid=qi2Omg
