كود بني ملال//

عرفات جماعة أيت عتاب واحد الحادثة خايبة بزاف، مشات فيها تلميذة فـ عمر الزهور، قدّام باب ثانوية القاضي عياض، الطفلة ضرباتها طموبيل خفيفة وهي كتقطع الطريق باش تدخل للمؤسسة ديالها.

الحادثة خلات واحد الجو ديال الحزن والاستياء وسط التلاميذ والأطر ديال الثانوية، خصوصاً حيث سيارة الإسعاف ما جاتش حتى دازت تقريباً ساعة، وهاد الشي خلى الناس يتساؤلو ويغضبو من ضعف التدخل السريع فبحال هاد الحالات الطارئة.

ساكنة أيت عتاب كيطالبو بممرات ديال الراجلين قدّام المدارس، ويكثفو المراقبة المرورية فوقت الدخول والخروج ديال التلاميذ، وكيناديو بتحسين خدمات الإسعاف باش تكون الاستجابة سريعة فالحوادث.

وكيف ما كان متوقّع، خرجات ساكنة أيت عتاب اليوم الإثنين فمظاهرة سلمية باش يحتجو على تأخر سيارة الإسعاف اللي تسبب فـ وفاة تلميذة قدّام ثانوية القاضي عياض.