كود – وكالات //

دارت المحكمة العليا للعدل فالمكسيك خطوة جديدة فملف الكيف ، بعدما قررات تخلي الناس  يوجدو ماكلة  فيها القنب الهندي أو مادة THC، ولكن بشرط تكون غير للاستهلاك الشخصي وماشي للبيع ولا التوزيع.

القرار جا من بعد طعن تقدم به واحد السيد ، مورا ما  ترفض ليه طلب باش ياخد ترخيص صحي من الهيئة الفيدرالية المكلفة بالحماية من المخاطر الصحية Cofepris، بهدف الاستهلاك الترفيهي.

المقررة فالقضية، الوزيرة لينيا باتريس غواداراما، اعتبرت أن استعمال الكيف فالطياب  ما كيختلفش، من الناحية العملية، على عمليات الفتيخ العادية، وبالتالي ما كاينش مبرر باش يتمنع إلا كانت الماكلة غادي تبقى مخصصة للاستهلاك الشخصي.

والمحكمة وضحات أن السماح محدود فـالاستهلاك الشخصي، وماشي ترخيص لإنتاج أو بيع المأكولات اللي فيها القنب. كما بقات المنتجات الأخرى، بحال الأدوية والمكملات والمشروبات ومستحضرات التجميل والمنتجات المعلبة، خاضعة للقيود والضوابط الصحية.