كود –  Nasa //

الرحلة  الفضائية  “Artemis II” ما ركزاتش غير على الجانب العلمي والتقني، ولكن حتى على تفاصيل يومية صغار، بحال شنو غادي ياكلو رواد الفضاء الربعة فهاد الجولة ديالهم على القمر.

فالسما الماكلة  ولات عنصر مهم باش يحافظ الطاقم  على التوازن البدني والنفسي للطاقم، خصوصا فمهمة صعيبة غادي تبقا عشرة أيام.

حسب المعلومات اللي خرجات من “NASA” وتقارير إعلامية أمريكية متخصصة، دارت ليستة ديال الماكلة فيها تقريبًا 189 نوع من الماكلة والمشروبات، تختارت  بمقايس موالمة لشروط السلامة وسهولة الأكل فوسط بلا جاذبية.

هاد الوجبات كتعتمد على تقنيات مختلفة، بحال التفوار وتسگية بالما، ولا التعقيم الحراري، و من بين هاد الوجبات الرئيسية كاين “كسكسو“ حيتاش مناسب من الناحية التقنية للفضاء.

و حسب مصادر أمريكية، من بينها مجلة “Scientific American”، الكسكسو كان من وجبات الطاقم، وحتى فواحد العرض مباشر ديال ناسا تم تقديمو فالفطور. وتقارير أخرى قالت أنه كيطيب مع  الخضرة بحال شيفلور ، بطريقة معدلة باش تناسب ظروف الرحلة الفضائية.

وتم اختيار الكسكس حيت ساهل يتوجد غير بالتسگية، ولحقاش عامر بالكربوهيدرات اللي كتزيد الطاقة دغيا، وقوامو ما كيشكلش خطر كبير بحال الخبز العادي اللي كيخلي الفرتيت لي يقدر يدخل لموطور ديال المركبة، هاد المزايا خلاتو خيار عملي فواحد النظام الغذائي محكوم ودروس باش ميكونش حتى مشكل فمركبة “Orion”.

كسكسو المغربي، واللي مسجل فاليونسكو وصل اليوم للسما،وهادشي كيبين كيفاش العلم والثقافة كيتلاقاو فانتظار يطلعو المغاربة حتى هوما شي نهار وعلاش لا ميديوش معهم حتى الحريرة كونجولي.