سامي العلوي، موفد “كود” لمزاب نواحي سطات //

بعد القرار التاريخي ديال سيدنا اللي كال فيه للمغاربة بلا ما تذبحو هاد العام ضحية العيد، طاقم “كود” نزل لسوق الخميس أولاد مراح، وبالضبط رحبة لبهيم، اللي تابعة لإقليم سطات، باش يسول الكسابة وياخد ارتساماتهم على هاد القرار.

فهاد السياق، قال سعيد، واحد من الكسابة فـ رحبة لبهايم بسوق أولاد مراح، أن قرار إلغاء العيد الكبير راه فصالح المواطن، ولكن فالمقابل راه كيضر الكسابة، وخاص يكون دعم ليهم، حيث الأرض ناشفة ومافيهاش ربيع، والحولي باقي كيتعلف، يعني خاص دعم من الجهات الوصية لموالين الحوالة بشوية العلف. وزاد كيقول بللي هاد الإلغاء راه فيه مصلحة عامة، وبلا شك اللحم غادي يرجع للثمن ديالو القديم، حيث دابا المواطن مبقاش قادر يشريه بسبب الغلاء ديالو.

من جهتو، محمد، حتا هو واحد من الكسابة ديال أواد فارس، اللي جا لسوق أولاد مراح، قال فتصريح لـ”كود”: “من قبل كان الثمن ديال الحولي غالي بزاف، ولكن دابا رجع نزل مع هاد القرار، والكسابة هما اللي تضرّو. كاين اللي شرا الحولي بـ5000 درهم ودّار التمارة، واليوم مع قرار الإلغاء راه عندو خسارة كبيرة. زيد عليها أن شي حريفية باعوا الحولي بالكريدي، والكساب دابا ولا مهدد يا إما يصبر، يا إما يرد السلعة. لهذا خاص دعم للكساب، حيث القرار راه زوين للبلاد، ولكن الضرر كاين عندهم، والسوق ولى خاوي والعلف بقى غالي”.

من جهتهم، شي مواطنين شافوا القرار من زاوية إيجابية، حيث قال واحد منهم: “هاد القرار راه زوين بزاف، وغادي يرجع اللحم فمتناول الجميع بعدما يطيح الثمن ديالو، حيث دابا لحم الغنم ولى بـ80 درهم بعدما كان بـ130 درهم، وتنشكرو سيدنا على هاد القرار اللي فصالح المواطن المغربي”.