كود -عثمان الشرقي  //

كريم بنزيما قرر يتهلا فراسو بطريقة مختلفة هاد المرة  مني شرا  فبلاصة  الحديد الغالي   طابلو غابر ديال الرسام  بيكاسو، لي معروف ب “Portrait d’Homme Barbu” واللي ترسم عام  1964.

بنزيما علن على هاد البيعة وشرية   فأنستغرام، ونشر تصويرة واقف فيها جنب اللوحة وكتب: “مرحبا بيك فالدار”، فإشارة باللي العمل الفني ولى جزء من مجموعتو الخاصة ،هاد اللوحة توصفات من طرف غاليري هيلي نهماد كعمل جريء وقوي، مرسوم بضربات الشيتة  باينة  وكتعكس الحيوية والدافع الإبداعي اللي كان كيميز بيكاسو فآخر يامو.

الشخصية المرسومة، راجل عندو اللحية  لابس توني مخطط ديال البحّارة، كتقرب بزاف لأسلوب بيكاسو وكتحسب عند بزاف النقاد إسقاط ذاتي للفنان راسو.

وبخصوص الثمن، ما تعلن حتى معلومة رسمية، خصوصاً وأن البيع كان على ما كيبان خاص وماشي  بالدلالة  ،ولكن مقارنة مع أعمال بحالها  من نفس الفترة تباعت فدار كريستيز،  وصل ثمنها ما بين نص مليون ومليون أورو، كتخلّي التقديرات تمشي فهاد الاتجاه.

بهذا الاختيار، كريم بنزيما كيبين باللي الاهتمامات ديالو كتفوت حدود كرة القدم، وكتوصل للفن والثقافة، وكيأكد حضور اسم كبير من عالم الرياضة فمجال اقتناء الأعمال الفنية العالمية.