كود – تطوان //

غير ليوم الصباح شدو عناصر الحرس المدني الإسباني كريم البقالي المتهم الأول في قتل جوج ضباط سبنيول من الحرس المدني الإسباني بعدما دخل فيهم بالباطو ديالو ف 9 فبراير الفايت فميناء بارباتي ف كاديس.

هاد الاعتقال خلّف ارتياح كبير بين عائلات القتيلين وداخل كل جهاز الحرس المدني الإسباني اللي هدر بسميتهوم بيدرو كارمونا، المتحدث باسم الجمعية ديالهم وقال هذا “خبر زوين، جا الوقت باش يدوز القاتل ياخذ جزاتو فالمحكمة”.

حتى الحكومة الإسبانية تهنات من هاد المنتف وحسات بالراحة بعدما تشد كريم وقال وزير الداخلية ديالهم مارلاسكا أنه مستعد لمواصلة العمل لمحاربة كل المنظمات الإجرامية التي تنشط في الاتجار الدولي للمخدرات.

كريم تشد ف كاديس، مع العلم أن الإعلام الإسباني كان متيقنا أنه مختبئ في المغرب وقالوا كّاع راه مخبي فمنطقة “الدالية” قرب مدينة طنجة، واتهموا المغرب بالتقاعس في التعاون في هذا الملف.

المغرب، كيف عادتو، بقا ساكت، وداير سغلو بالسكات، الدّق تم، ولم يرد على قفزات جانب من الإعلام الإسباني ولا على تصريحات ممثلين عن الحرس المدني الإسباني اللي طالبوا المغرب بالتحرك للقبض على كريم وصحابو اللي أكدوا أنهم مخبيين فالمغرب.

وليوم تشد كريم فسبانيا، وخرجو مسؤولين إسبان كيشكروا المغرب من ريوسهوم على التعاون ديالو الكامل والمطلق في هذا الملف.