كود سبور//

عبر الدولي البرتغالي كريستيانو رونالدو على الحزن ديالو حيث فشل فالتتويج بكأس العالم مع منتخب البرتغال، والإقصاء اللي تعرض ليه البارح من ربع نهائي مونديال قطر 2022، على يد المنتخب الوطني المغربي وطلب المسامحة من الجمهور البرتغالي حيث ما قدرش يحقق حلم الفوز بكأس العالم.

وفأول خروح له من بعد صدمة الهزيمة أمام المغرب بنتيجة 1 ـ 0 والإقصاء خرج نجم البرتغالي كريستيانو رونالدو وقال على مواقع التواصل الاجتماعي: “كان الفوز بكأس العالم مع البرتغال أكبر حلم فالكاركيير ديالي وأكثر حاحة طمحت نحققها، كنت محظوظ حيث ربحت بزاف ديال الألقاب الدولية من بينها أنني لعب للبرتغال، ولكن كان أكبر حلم عندي هو نحط بلادي فصدارة العالم”.

وكمل كريستيانو رونالدو وقال: “تقاتلت وناضلت بزاف بش نحقق هاد الحلم، ولعبت 5 المرات كأس العالم لمدة 16 عام، وكنت ديما مع لعابا واعرين، وكيدعمونا ملايين البرتغاليين، عطيت كلشي اللي عندي، ودابا غادي نخلي كلشي برا التيران، وعمري ما عطيت بالظهر وعمري تخليت على هاد الحلم، ما عندناش الزهر سالا الحلم البارح، وبغيتكم غير تعرفو بلي تقال بزاف وتكتب بزاف، ولكن التركيز ديالي مع المنتخب عمرو ما تغير، وكنت ديما كنعاون الجميع وعمري غادي نعطي بالظهر للزملاء ديالي ولبلادي”.

وختم كرستيانو رونالدو الرسالة ديالو وشكر قطر على المونديال اللي منظمة وترك قرار الاعتزال الدولي أو مواصلة اللعب مع منتخب البرتغال مفتوح مع تلميح بلي راه كايفكر فهادشي وقال: “ماعنديش بزاف ما نقول دابا، شكرا البرتغال، شكرا قطر.. كان الحلم زوين، ودابا نتمنى تكون الأجواء مزيانة وكل واحد يقرر شنو باغي”.