گود سبور//

كايبان أن قصة الأسطورة البرتغالي كريستيانو رونالدو مع منتخب البرتغال سالات.

كريستيانو رونالدو مول 41 عام، خرج من معسكر المنتخب البرتغالي استعدادا لماتش الدنمارك اللي ملعوب غدا الخميس، ومشى بحالو اليوم الاربعاء.

ونشر كريستيانو رونالدو تدوينة على إنستغرام قال فيها: “بعد المؤتمر الصحفي لمدرب المنتخب الوطني، وبعد محادثة مع رئيس الاتحاد البرتغالي لكرة القدم، اتخذت قرار مغادرة معسكر تدريب المنتخب الوطني”.

وكمل كريستيانو رونالدو، وقال: “ملي يجي الوقت المناسب، غادي نقول لجميع الشعب البرتغالي الحقيقة حول الأسباب اللي خلاتني نرحل على المنتخب الوطني، واللي كنت ديما ملتزم فيه، ودابا جا الوقت اللي نتمنى فيه التوفيق للبرتغال ولجميع زملائي فالفريق”.

وبدات الأزمة ملي مدرب البرتغال جيسوس ما دخلش كريستيانو رونالدو الماتش اللي فات ضد النرويج ضمن منافسات دوري الأمم الأوروبية، وبقى الماتش كامل فالاحتياط، وملي سالا الماتش ما مشاش مع صحابو اللاعبين باش يدير التحية للجمهور.

الأزمة تطورت بين المدرب البرتغالي ونجم البرتغال كريستيانو رونالدو فهاد اليومين اللي فاتو، لدرجة أن رئيس الاتحاد البرتغالي لكرة القدم سافر حتى للدنمارك لمعسكر المنتخب البرتغالي باش يحل الأزمة، ولكن كاتبات أن القضية كبرات بزاف، وقصة كريستيانو رونالدو مع منتخب البرتغال سالات.