كود – سبتة//

قالت جمعية إيلين لي كدافع على حقوق المهاجرين واللاجئين، نهار الاثنين، بلي كثر من ألف واحد مشدودة فشاطئ ترامبولين بمدينة سبتة كيدوزو من وضعية إنسانية “خطيرة بزاف”، بعدما داز عليهم كثر من خمسة أيام بلا ماكلة ، ومن صباح اليوم الاثنين مبقاش عندهم الماء ديال الشريب بعدما تسدات النقطة لي كتفورنيه لهم.

الجمعية قالت بلي الما تقطع على WC، الشي اللي غيزيد يكرفص ضروف النظافة والصحة،

ووضحت إيلين أنها وثقات الوضع ميدانياً، وقالت إن المساعدة الوحيدة اللي وصلات للحراگة هي سترينة ديال ماء من الجيش الإسباني، ولكن اعتبرات هاد الخطوة مكافياش، خصوصاً وأن الناس محتاجة حتى الماكلة.

وزادت الجمعية أن سلطات سبتة برارت قطع الماء بكونو “ما صالحش للشرب”، عكس المنظمة لي قالت أن اللافتة الموجودة فوق نقطة الماء كاتأكد بلي أنه الما حلو.

المبادرات اللي داروها متطوعون وسكان من سبتة باش يوصلو الماكلة والما اللحراگة، خلا الحقوقيين ينحلو لمسؤولية الدولة لي خاص تكلف على حد قولهم، ماشي المواطنين.

وحسب المنظمة، من بين المحتجزين كاينين أشخاص جايين من السودان واليمن وإريتريا وسيراليون والنيجر ونيجيريا ومالي وبنغلاديش وفلسطين وتشاد وغامبيا وجمهورية إفريقيا الوسطى وبنين وغينيا كوناكري، وعدد كبير منهم هرب من الحرب والاضطهاد والانتهاكات الخطيرة لحقوق الإنسان، ولي عندهم الحق يطلبو الحماية الدولية.

وفالأخير، طالبت جمعية إيلين السلطات الإسبانية بتوفير الماكلة والماء دغيا، وإعطاء معلومات على للمحتجزين، واحترام حقوق الإنسان وحق طلب اللجوء، كيف ما أكدات “الجوع والعيا ما يمكنش يكونو جواب دولة ديمقراطية على أشخاص كيقلبو على الحماية ومستقبل أفضل”.