وكالات//

وقعت حادثة غريبة فالصين دارت البوز وخلقات جدل كبير، من بعد ما تصابت بنت عندها 20 عام بمشاكل خطيرة فالكلي، حيث كانت كتصبغ شعرها كل شهر باش تقلّد اللوك ديال نجمها المفضل من نجوم الـK-pop.

وحسب جريدة “ساوث تشاينا”، البنت اللي سميتها “هوا” ومن إقليم خنان اللي فوسط الصين، كانت كتمشي للصالون كل مرة كيبدّل فيها النجم ديالها لون شعره ولا التسريحة ديالو، وكتدير نفس الشي. ورغم ما قالوش شكون هو هاد النجم، النقاشات فالسوشيال ميديا الصينية كانت كتدور على الهوس بتبدال لون الشعر اللي ولى من سمات نجوم البوب الكوري.

من بعد ما بدات كتحس بأعراض غريبة بحال بقع حمراء فالرجلين، وألم فالمفاصل والمعدة، مشات دارت التحاليل وكتشفو أنها مريضة بالتهاب فالكلاوي. الطبيب تاو تشنيانغ من مستشفى الشعب فتشنغتشو قال أن كثرة استعمال صباغات الشعر خلا المواد السامة تدخل من فروة الراس للدم، وقال أن هاد الصباغات فيها الرصاص، الزئبق، ومكونات خطيرة ممكن تسبب فشل كلوي ولا حتى مشاكل فالتنفس، وزيد عليها ترفع من خطر السرطان.

الناس فالصين بداو يهضرو بزاف على هاد الموضوع، وكاين اللي شاف أن هاد الهوس بنجوم الـK-pop ولى زايد على القياس، حيث بزاف ديال المعجبين كيحاولو يقلدو النجوم فكلشي، حتى فالحوايج اللي ممكن تضرهم.