كود -flscience//

كشفات دراسة علمية جديدة على السلوك ديال الكلاب، أن شي سلالات ماشي غير كتعوك بشكل عشوائي، ولكن عندها القدرة تبدل نغمة الصوت ديالها وتنساجم مع الموسيقى لي كتسمع، هاد الاكتشاف جا بعد تجارب دارت على كلاب معروفة بتعواكها لي كيتعاود خصوصاً مع الأغاني والأصوات الطالعة .

الباحثين خدمو مع مجموعة من الكلاب، من بينها لاراص ديال “سامويد” و”شيبا إينو”، وطلبو من ماليها يسجلو فيديوهات وهي كتعوك مع موروسوات موسيقية مختلفة، الفريق العلمي بدّل النغمة مرة طالعة مرة هابطة باش يشوف واش الكلاب غادي تتفاعل وتغيّر الصوت ديالها .

النتائج بينات باللي بعض الكلاب، خصوصاً من نوع سامويد، كانت قادرة تضبط التعواك ديالها وتبدل النغمة بشكل واضح مع الموسيقى، بعض الحالات حتى بيّنت تغييرات دقيقة فخصائص الصوت، الشي لي كيعني أن الكلاب عندها نوع من التحكم الصوتي أكثر تطور مما كان متوقع.

الدراسة كتشير حتى أن هاد السلوك ممكن يكون موروث من الذياب، لي كتعتمد على التعواك الجماعي مع تغير النغمة باش تعطي انطباع بالقوة والتواجد الكبير، هكا كيبان أن بعض الكلاب مازال عندها هاد المهارات القديمة، وكتقدر تتفاعل مع الأصوات بطريقة قريبة للبشر أكثر مما كنا كنتصورو.