كود -وكالات //

ديما فاش كيتجبد النقاش على الجسد والجنسانية ، كيمشي البال ديريكت للنظرة الذكورية الكلاسيكية اللي كتشوف فالمرأة غير موضوع للمتعة والتقييم، ولكن كاينة واحد ضاهرة سوسيولوجية اسمها The Female Gaze كتجي باش تقلب الآية وتطرح سؤال جدي ومعاكس لي هو كيفاش كتشوف المرأة الجسد ديال الراجل فالمجتمع المعاصر، وكيفاش كتحول هاد النظرة لممارسة ثقافية واجتماعية واعية بذاتها .

بالاعتماد على هاد المقاربة كيبان لينا باللي جسد الراجل مابقاش خارج على دائرة التقييم، ولكن ولى حتى هو كنتعاملوا معاه كـ “رأسمال جسدي” خاضع للطلب وللمعايير الجمالية اللي كيحددوها العيالات، هاد التحول كيبين باللي المرأة مابقتش فموقع سلبي كتكتفي باستقبال النظرة والاعجاب، ؤ ولات فاعل اجتماعي كيمارس سلطة الاختيار والنقد، وكتعبر على الرغبة ديالها فجسد الرجل (سوا من ناحية الطول، البنية، أو اللباس) بكل جرأة وحريةأكبر من أي وقت كان.

هاد الديناميكية الجديدة كتبان مزيان فالفضاء الرقمي وتطبيقات ديال الملاقية، فين ولات المرأة هي اللي كتمارس سلطة الانتقاء والفرز بناءً على النظرة البصرية السريعة، هاد الشيء فرض على الراجل ضغط جمالي جديد خلاه يهتم بصناعة الجسد ديالو ويدخل لثقافة اللياقة البدنية وعمليات التجميل ماشي غير على قبل الصحة أو القوة، ولكن حتى استجابة للمقاييس الجمالية اللي كتفضلها المرأة، وهو ما يعني أن جسد الرجل دخل حتى هو فمسلسل التقييم المستمر من طرف الاخر .

هاد الدراسة الأنثروبولوجية كتخلينا نطرحو سؤال نقدي عميق على طبيعة هاد النظرة ، واش هي خطوة لتحرر والمساواة حيت كتعاود توازن القوى فالعلاقات الإنسانية وكتعطي للمرأة نفس سلطة النظر والتقييم، ولا غير إعادة إنتاج لنفس آليات التسليع والضغط الجسدي اللي عاناو منها العيالات لقرون ؟