كود الرباط//

في خطوة استباقية واحترازية، قررت كتابة الدولة المكلفة بالصيد البحري منع صيد الحبار (seiche) بشكل مؤقت جنوب سيدي الغازي، بالتزامن مع فترة الراحة البيولوجية لصيد الأخطبوط التي تمتد من فاتح أبريل إلى غاية 31 ماي 2025. هاد القرار، اللي جا ضمن المقرر الوزاري رقم 25PLP-01، ماشي غير تدبير إداري عابر، بل هو استجابة حتمية لمعطيات مقلقة بخصوص تدهور المخزون الرخوي فهاذ المنطقة.

وحسب بلاغ رسمي صادر نهار الأحد 30 مارس، المنع المؤقت جا بعد تسجيل ارتفاع مفرط فصيد الحبار بنسبة 81 فالمية ما بين 2022 و2023، متبوع بانخفاض خطير فالكميات المصطادة بنسبة 50 فالمية ما بين 2023 و2024، حيث تراجعت الكمية من 35877 طن إلى 18013 طن فقط. هاد الأرقام، اللي قدمها المعهد الوطني للبحث في الصيد البحري، كتؤكد أن المصيدة ما بقاتش قادرة تتحمل الضغط الكبير اللي كيتعرض ليه هاد النوع، الشي اللي كيهدد استدامته بشكل مباشر.

وكتابة الدولة شددت على أن القرار ماشي عشوائي، وإنما كيتماشى مع توجهات مخطط ’’آليوتيس” اللي كيراهن على استغلال عقلاني ومستدام للثروات البحرية. كما أن المعهد الوطني كيأكد على ضرورة اتخاذ تدابير خاصة باش نرجعو التوازن للمخزون وضمان استمراريته فالمستقبل.