كود سبور//

عكس داكشي اللي كايروج على أن الاتحاد الإفريقي لكرة القدم، قرر يدير تغيير على مسابقتي دوري أبطال إفريقيا وكأس الكونفدرالية الإفريقية، ويرفع عدد الأندية من البطولات المحلية الكبيرة، راه ما كاين والو من هذا الشي فالنسخة المقبلة والموضوع مازال قيد الدراسة من طرف لجنة المسابقات فالكاف.

وما غيكون حتى شي تغيير فالشومبيونزليكـ وكأس الكونفدرالية الأفريقية فالموسم الرياضي 2025-2026، وبالمقابل راه الكاف كايدرسو رفع عدد الأندية من البطولة المحلية القوية ابتداء من موسم 2026-2027، وهذا راه مازال غير كايدرسوه مازال ما كاين حتى شي حاجة رسمية.

أما بخصوص موعد تسجيل الأندية المشاركة فدوري أبطال أفريقيا وكأس الكونفدرالية للاعبين اللي غاتكونفوكيهم فالمسابقتين بجوج، حدد الاتحاد الأفريقي يوم 31 يوليوز 2025، كأخر أجل باش الأندية المعنية ترسل لوائح ديال اللاعبين باش غاتشارك فالبطولات بجوج، بعدما كان التاريخ السابق هو 30 يونيو 2025.

ومشارك المغرب فدوري أبطال إفريقيا بنهضة بركان المتوج بالبطولة الاحترافية، والجيش الملكي الوصيف ديالو، والوداد مشاركين فكاس الكونفيدرالية حيث جاو ثالثين، ومازال ما تحدد الفريق الثاني اللي غايلعب كأس الكاف، حيث فينال كأس العرش باقي ما تلعب.