الرئيسية > آراء > كاين شي ناس من الاحسن ليهم و للمجتمع انهم يبقاو مزاليط ! حيت غي كايتزاد عليهم الريال كايوليو “طاغيات” فحال مي نعيمة مثلا لي كاتدعي على المتابعين بالسرطان و كاتستهتر بمعاناة الناس لي مصابين بيه
24/11/2021 19:00 آراء

كاين شي ناس من الاحسن ليهم و للمجتمع انهم يبقاو مزاليط ! حيت غي كايتزاد عليهم الريال كايوليو “طاغيات” فحال مي نعيمة مثلا لي كاتدعي على المتابعين بالسرطان و كاتستهتر بمعاناة الناس لي مصابين بيه

كاين شي ناس من الاحسن ليهم و للمجتمع انهم يبقاو مزاليط ! حيت غي كايتزاد عليهم الريال كايوليو “طاغيات” فحال مي نعيمة مثلا لي كاتدعي على المتابعين بالسرطان و كاتستهتر بمعاناة الناس لي مصابين بيه

سهام البارودي – كود//

واحد النهار كنعقل فالليسي واحد البنت كاتقرا معايا سولات  الاستاذ ديال لانفورماتيك علاش كاينين الفقراء ؟ علاش ماشي كلشي لاباس عليه و بيخير و على خير و قاليها ” حيت كاينين شي ناس مايصلاح ليهم غي يكونو فقراء! ماشي فمصلحتهم و فمصلحة الناس انهم يديرو لاباس” هاد الهضرة تقدر تكون تخربيقة و لكن انا شخصيا كانشوف بلي عندو الحق و بلي بزاف ديال الناس من الاحسن ليهم و لينا انهم يبقاو مزاليط ! الزلط كايأدبهم و كايربيهم و كايكونو كائنات احسن فاش كايكونو مزلوطين ! حيت اين فوا كايطيحو فيديهم الفلوس كايخرجو من وسطهم واحد الوحش منو ماكاين ! و كايوليو ” طاغيات” فحال لي قال مول الاوديو ديال الخيط البيض !

مي نعيمة مثلا فاش كانت انسانة مزلوطة ! درويشة ! اقصى امل ديالها هوا يونس مول قناة مربوحة يعطيها ربعالاف درهم فالشهر ! كانت ضريفة و كاتدخل المشاهدين بيا وليداتي و يا بنياتي الله يسهل عليكم و سمحو ليا وليداتي مكم نعيمة ماقارياش و مكم نعيمة درويشة و شي تمسكين و شي تبلحيس ماكاينش فحالو ! و دابا ملي دارت الفلوس و الديور و الكونط و السنان و الطوموبيل تسيفات ولات وحدة اخرى ضاسرة و معنتتة لدرجة مؤخرا عايرات اي واحد قاليك دار ليها ديسلايك للفيديوات ديالها بالكونصير فالصباع !

انا من ديما كانآمن بلي الفقر لا يصنع الرجال بالعكس ! الفقر يصنع العاهات ! يصنع انسان مامربيش ! جاهل ! مزروب ! ماكايعرفش يفكر و يتعامل ! الفقر يصنع انسان مريض اقصى امانيه فاش كايدير الفلوس انه ينتقم ! ينتقم من الحياة و من الناس و من ايتها حاجة ! كايطغى ! تقدر تعطيه شوية ديال البوڤوار يعفط على عباد الله شوفو مثلا غي السيكيريتي فباب شي سبيطار ! واخا كايشد غي ربعين الف ريال كاتلقى عندو واحد الرغبة فالتسلط و القمع ماعندهاش الحد ! كايدفع الناس و يهينهم و ينهصرهم حيت كايحس براسو عندو سلطة عليهم ! شوية ديال السلطة كاتصنع من واحد نكرة طاغية ! كبر كنكرة و عاش حياتو كاملة كنكرة و فاق الصباح نكرة و شد الطوبيس نكرة … يتوهم انه غي حيت لبس كسوة ديال السيكيريتي راه تحول من نكرة الى انسان عندو قدرة يقرر فمصير عباد الله واش يدخلو زيارة و لا لا ؟ واش يشوفو الطبيب و لا لا ؟

للاسف ! هادشي لي واقع لبزاف ديال اليوتوبرز المغاربة منهم نعيمة البدوية لي تاهي كبرات و عاشت نكرة و أكيد الزلط لي عاشت فيه و القوادة لي عاشت فيها ركبو فيها امراض نفسية و عقد كبيرة الفلوس و الجاه و الاحساس بشوية د السلطة غادي يعري عليهم !

اليوم عايرات المتابعين بالكلاب الضالة و دعات عليهم بالكونصير ! غدا تقدر تخرا و طلس فوق الكاميرا باش تقوليهم ها ماتسواو !

و راه بصح لي متابع نعيمة البدوية داكشي لي كايسوى !

موضوعات أخرى

09/12/2021 13:35

وزير الصحة رد على شكايات “تبديد 200 مليار” فصفقات كورونا: درنا الصفقات بطريقة سلسلة وقانونية وراقبتها لجن تفتيشية – فيديو

09/12/2021 13:30

مكاينش فتح الحدود.. وزير الصحة: حتى تسالي 14 يوم لي حددنا فالإغلاق عاد نقررو.. وعودة المغاربة العالقين غايكون بـ”بروتوكول” – فيديو

09/12/2021 12:00

حصري. ضحية فقضية “الجنس مقابل النقاط”: أستاذ جامعي طلب ينعس معايا ومع ختي ومي.. وكان كيصيفطلي البورنو فواتساب وحتى تصويرتو مع شخصية سياسية نافذة