سهام البارودي – كود //

هاد العام وانا ففرانسا تصادفت مع ربعطاش يوليوز ! ذكرى سقوط سجن لاباستيي و بداية الثورة الفرنسية ! ربعطاش يوليوز ففرانسا ماشي غير نهار مافيه لاخدمة لاقراية ! بل هوا نهار كبير كايبداو فيه الاحتفالات من الليلة ديالو نهار ثلطاش فين كايتنظمو السهرات فالقشالي  ديال البومبية اييه آ سي كاتمشي تقصر فالقشلة مع البومبية و كاتستامر حتى للطناش ديال الليل نهار ربعطاش ! قبل كنت كانتفرج فالعرض العسكري غير فالتلفزة و هاد العام قلت غانمشي نتفرج فيه مباشرة ! و ماندمتش ! دوزت صباح زوين بزاف ! واخا الطرونسبور قليل حيت كاينين اضرابات النقل فباريس وواخا بزاف ديال المحطات ديال الميترو لي قراب من الشونزيليزي سادينهم لاعتبارات أمنية ! فقت و لبست و مشيت نتفرج مع الناس ! باريس عامرة بوليس ! عامرة عسكر ! گاع الزناقي لي قراب للمكان ديال الاحتفال مطوقين !

كاتحس بالهيبة ديال الدولة فاش كاتشوف العرض العسكري و خصوصا فاش كايدوزو قدامك مركبات عسكرية شاركات فالحرب العالمية الاولى و الثانية و حتى فالحروب الاخرى فحال حرب العراق و لبنان و افريقية الوسطى … العرض العسكري كايبين فرانسا قوية و خصوصا بلي راها بلاد عندها تاريخ كبير و كاتعرضو قدام العالم كامل كل عام نهار ربعطاش يوليوز !

هاد العيد بعيدا على البعد الرمزي ديالو بالنسبة لفرانسا فراه مناسبة كبيرة للاحتفال سواءا بالنسبة للفرنسيين او الاجانب و السياح ! قبايلة فالعرض العسكري الاغلبية الساحقة كانو توريست ! صفقو على العكسر و البومبية و شيرو للرئيس ماكرون فاش داز قدامهم !

بقيت كانقول مع راسي علاش مايكونوش عندنا تاحنا احتفالات كبيرة بعيد الاستقلال ؟ دابا راه لامشيتي سولتي شحال من مغربي سوا لي قاري سوا لي ماقاريش على تاريخ استقلال المغرب بزاف ماغايعرفوهش ! كاينين دكاترة ماعارفينش هاد المعلومة ! كاينين مهندسين و اطباء و اساتذة ماعارفينش … علاش ؟ حيت قراوها فالمدرسة و نساوها حيت ماكاينينش شي احتفالات رسمية لي كاتخلي الناس تعقل على هاد التاريخ !

ماشي فيلم قديم فالتلفزة كايهضر على الحركة الوطنية لا ؟ راه الناس كايعقلو على الحاجة لي فيها الشطيح و الرديح و الموسيقى و النشاط اكثر ماكايعقلو على اي حاجة اخرى ! و التوريست كايجيو يشوفو الحاجة لي فيها النشاط ! هاهي مناسبة رسمية عادية كان يمكن انه يبقى عندها داك الطابع الرسمي فقط ! عرفات فرانسا كيفاش تخليها موعد لجلب السياح و عباد الله ! القهاوي و الريسطورات كايعرضو عليك تجلس عندهم باش تشوف الديفيلي ! البارات لي عندهم السطح كايعرضو عليك باش تشوف العرض ديال الطائرات ! الانشطة و الحفلات فالاماكن العمومية كلها على شرف 14 جويي ! واخا تسد عليك باب دارك غايدخلو عليك الاحتفالات عبر التلفزة حتى لبيت النعاس !

من مناسبة رسمية عادية الى قبلة للسياح و مناسبة للنشاط و الاستمتاع ! هادشي علاش كانشوف بلي احتفالات عيد الاستقلال فالمغرب خاص تكون فمستوى الحدث و تتنظم بشكل يعجب المغاربة و يثير السياح ! حتى حنا عندنا تاريخنا ! علاش مانڤالوريزيوهش ؟