كود سبور//

دارو الفتح الرياضي خطوة زوينة لمحاربة الذكورية فالرياضة واللي منتشرة فبزاف ديال الأندية نتيجة تجدرها فالمجتمع المغربي، وجابو بنات من الفئات السنية النسوية يديرو راماسورات فالماتش ضد الوداد الرياضي اليوم الاحد فتيران البشير برسم الدورة 9 من البطولة الاحترافية.

وسول “گود” مصادر فالفتح الرياضي على هاد الخطوة اللي دارو واللي كايحاربو من خلالها الذكورية فالرياضة، وقالت المصادر إن هذه الخطوة داروها النادي الرباطي باش يعطيو فرصة للعنصر النسوي يولفو على البطولة والماتشات الكبار، وأنه غايبقاو يديرو مرة بنات راماسورات ومرة ولاد راماسورا بالمساواة.

ومن شأن هذه الخطوة الزوينة للي دارو الفتح الرياضي تشجع الأندية الأخرى فالبطولة باش تمشي حتى هي على نفس الطريق وتبين الاهتمام بالبنات والعنصر النسوي على أرض الواقع.