كود سبور//

بدا المنتخب الوطني المغربي لأقل من 17 سنة، مساء اليوم الاثنين 31 مارس 2025، كايوجد للماتشات الجوج الجايين من دور المجموعات ضمن نهائيات كأس أمم إفريقيا لأقل من 17 سنة، اللي منظمها المغرب إلى غاية 19 أبريل المقبل, ودارو اللاعب حصة تدريبية باش يرجعو لافريشور فيزيك بعدما ربحو البارح الماتش ضد أوگندا.

وقسّم الناخب الوطني، نبيل باها، اللاعبين د المنتخب المغربي لجوج گروبات، گروب فيه العناصر اللي شاركت فالماتش، ودارو حصة تدريبية خفيفة فلاصال “لانوريا” بالمحمدية، وكانت الحصة مركزة على الاستشفاء وحيدو العيا، گروب آخر فيه العناصر اللي ما لعبوش الماتش، ودار حصة تدريبية فالتيران للحفاظ على جاهزيتهم البدنية والرفع من التنافسية.

وكايوجد المنتخب الوطني المغربي باش يلعب ضد زامبيا يوم الخميس الجاي، ضمن الجولة الثانية من دور المجموعات، فماتش غايكون حاسم لضمان التأهل بكري لدور ثمن النهائي من كاس أفريقيا U17.

ومتصدر المنتخب الوطني المغربي لأقل من 17 سنة ترتيب المجموعة الأولى برصيد ثلاث نقاط، وفايت زامبيا بفارق الأهداف، اللي حتى هو ربح اول ماتش له فالبطولة ضد تنزانيا بأربعة أهداف مقابل هدف واحد.

وغايبدا الماتش بين المنتخب الوطني المغربي لأقل من 17 سنة ومنتخب زامبيا، الخميس الجاي فتيران البشير فالمحمدية مع 8 الليل.