وكالات//

مات مغني الروك البريطاني إيان واتكينز، اللي كان هو المغني الرئيسي ديال فرقة Lostprophets، واللي سبق ليه وقف على الخشبة مع فرق مشهورة بحال Metallica وSlipknot، (مات) فالحبس ديالو فبريطانيا وعندو 48 عام، من بعد ما تعرض لهجوم عنيف.

واتكينز كان كيدوز عقوبة ديال 29 عام فحبس “واكيفيلد” فجهة يوركشاير فشمال إنجلترا، من بعدما تحكم عليه فـ2013 بجرائم جنسية خطيرة ضد الأطفال.

حسب البوليس البريطاني، الطوارئ جاو صباح السبت 11 أكتوبر من بعدما توصلو بتبليغ على اعتداء خطير فالحبس، ولكن رغم المحاولات باش ينقذوه، مات فبلاصة الحادث. وفـ13 أكتوبر، البوليس أكدو أن جوج دالناس توجهات ليهم تهم القتل: رشيد جيديل عندو 25 عام، وصموئيل دودسورث عندو 43 عام، وغادي يتعرضو قدّام المحكمة.

الوفاة ديالو كتحط النقطة الأخيرة فحياة كانت عامرة بالجدل، حيث داز من نجم روك عالمي لمجرم مدان.

فرقة Lostprophets تأسسات فويلز فـ1997، ودارو نجاح كبير وباعو ملايين النسخ من الألبومات ديالهم، ولكن كلشي تهرس فـ2013 من بعدما تحكم على واتكينز بـ13 تهمة جنسية، اللي كانت منها محاولة اغتصاب رضيع وحيازة مواد إباحية خطيرة بزاف، وحتى القاضي قال إن الجرائم ديالو كانت “سافلة وماسبقش ليه شاف بحالها”.

من بعدما تحكم عليه بالحبس، الفرقة علنات أنها قطعات علاقتهما معاه، ورجعو تأسسو من جديد باسم No Devotion، بلا ما يبقى عندهم شي علاقة بيه.