وكالات//

جراو على مهندس من خدمتو ف الصين من بعد ما كان كيدير فترات راحة كثيرة وطويلة بزاف فطواليط، شي مرات كتوصل حتى لساعات، رغم أنه قال باللي السبب هو أنه كيعاني من الباسر.

وحسب تقرير نشراتو جريدة  South China Morning Post، السجل بيّن أن الموظف، اللي معروف باسم “لي”، دخل لطواليط 14 مرة غير فشهر واحد، وأطول مرة بقا 4 سوايع.

هاد القضية شدّات انتباه الرأي العام من بعد ما رفع لي دعوى قضائية ضد الشركة، وكيطالب بتعويض على الفصل التعسفي.

وفالتفاصيل، لي كان خدا الخدمة فالشركة فمقاطعة جيانغسو عام 2010، وجدّد العقد المفتوح ديالو فـ2014، وكانت خدمتو كتطلب الحضور الدائم والتجاوب السريع مع طلبات الخدمة.

ومن بعد ما لاحظو المسؤولين الغياب المتكرر ديالو، حاولو يتاصلو به عبر تطبيق ديال الدردشة، ولكن ما جاهم حتى رد.

“لي” دافع على راسو وقدم أدوية ديال البواسير اللي شراها من الإنترنت، وزاد عطا سجلات ديال العلاج فالسبيطار، وأكد باللي الحالة الصحية ديالو هي السبب فهاد الغيابات الطويلة، وطالب بتعويض لقدر ديالو  320 ألف يوان (حوالي 45 ألف دولار) على الفصل التعسفي.