وكالات//

بان دب كحل كيتجول بهدوء ورا مرا مسنّة كتمشى بمشاية فواحد الحي بولاية كونيتيكت الأميركية، خلق حالة ديال القلق وسط السكان، خصوصاً مع تزايد التحذيرات من ارتفاع عدد الدببة السوداء وقربها المتكرر من المناطق السكنية.

الكاميرات ديال قناة WTNH التابعة لشبكة ABC وثقات المشهد صباح الأربعاء 11 يونيو، فمنطقة ويست هارتفورد، حيث تشاف الدب وهو غادي قريب من السيدة، اللي دخلات للدار بسرعة هي والمرافق ديالها ملي شافوه. وصهرها، بوب ميتشل، قال: “جات عندي وقالت لي: كاين دب. ما كانتش خايفة… راه قوية وكتحب المشي”.

وفواحد الحادثة خرى فنفس المنطقة، شافت بنت عندها 13 عام جوج ديال الدببة وهي راجعة من المدرسة. والأم ديالها، جانيت داردين، قالت أن البنت خباراتْها بهدوء بوجود الدببة، ووصفت الموقف بأنه تجربة حقيقية باش الواحد يتعلم كيفاش يتعامل مع الحياة البرية.

من جهتها، وزارة الطاقة وحماية البيئة فكونيتيكت (DEEP)قالت أن رؤية الدببة السوداء ولات عادية حتى فالأحياء، بسبب كثرة الماكلة اللي كتكون قريبة من الديور، بحال الزبل، وبذور الطيور، وطعام الحيوانات اللي كيتخلى عليه، وهادشي خلا الدببة ولات أكثر جرأة وولات ما كاتخافش من الناس.