الرئيسية > آش واقع > كان كايلعب عليهم التقوى والورع.. بولحية نصب على تجار ف 2 مليار دالسنتيم بقرعة دارت
18/01/2020 12:30 آش واقع

كان كايلعب عليهم التقوى والورع.. بولحية نصب على تجار ف 2 مليار دالسنتيم بقرعة دارت

كان كايلعب عليهم التقوى والورع.. بولحية نصب على تجار ف 2 مليار دالسنتيم بقرعة دارت

عفراء علوي محمدي- كود//

علمت “كود” من مصادر خاصة أن مجموعة من تجار القريعة ومحلات كاراج علال وقيسارية الحي محمدي، وللي كايبلغ عددهم ما يقارب 50 واحد، حطو شكاية مباشرة عند وكيل الملك، كايتاهمو فيها واحد بولحية كايسكن فالحي المحمدي سميتو (ع.ط) بالنصب عليهم فأكثر من 2 مليار سنتيم من خلال قرعة “دارت”، وهو الآن روشيرشي، ومازال ما ظهر ليه الأثر.

مصادر “كود” كشفات أن السيد كان كايتردد على قيسارية الحي المحمدي والقريعة لأكثر من 10 سنوات، كايقوم فيهم بمعاملات تجارية مع مجموعة من التجار واخا ماعندوش محل، حيت كان يجيبليهوم السلعة ويتسخر عليهم، وبيع لهذا ويشري لهذا، حتى استطع يكسب ثقة الجميع، خصوصا وأنه كان معطر فمو بذكر الله والصلاة على النبي، ولاعب فيها “تقي” و”ورع”.

المصادر نفسها أكدات أن بولحية استطع أنه يقنع كاع التجار للي كايتعامل معاهم باش يديرو دارت على أساس ياخدها هو اللول بحكم أنه متبوع بشي كريديات وخاصو يخلص شي خطيات، وعاد زيد المرض ديال الوالدين، وهكذا قدر بسهولة يلعب على عواطفهم ويجمع الحصيصة، زائد أنه تسلف من عند بزاف فلوس خرين من غير القرعة، ومن بعد حول كلشي للأورو، وضربها بسلتة وطفى التيليفون.

صحاب المتهم، للي هضرات “كود” مع شي وحدين فيهم، كانوا كايعرفوه قبل عشر سنوات كايلبس عادي بحال كاع الناس، حتى وللى يجمع مع شي سلفيين فجامع الإخلاص حدى القسارية، ومن تماك تبدلات حياتو، ودغيا ربى اللحيا، وولا داير فيها متدين ومتقي الله، حتى كلا للناس عقولهم وتبتهم قبل ما ياكلهم ففلوسهم.

موضوعات أخرى