وكالات//

تشدّ شاب شينوي عندو 20 عام، من بعد ما حاول يحلّ باب طيارة فوسط الرحلة ديال الخطوط الجوية Cathay Pacific رقمCX811، اللي كانت جاية من بوسطن لهونغ كونغ، نهار 10 دجنبر، حسب ما قالت وكالة “رويترز‘‘.

وقال واحد الناطق باسم الشركة: “طاقم الطيارة تعامل مع الوضع بسرعة، وتأكد باللي الباب مسدود مزيان، وبلغ السلطات المختصة والبوليس بالحادث”. وزاد قال: “الملف تحال على البوليس باش يديرو تحقيق. سلامة الزبناء وطاقم الطيارة هي الأولوية ديالنا‘‘.

وأكدات الشركة باللي الطيارة هبطات بسلام، وما كانت حتى شي إصابة لا وسط الركاب ولا الطاقم. ومن جهتها، شرطة هونغ كونغ شدّات داك الشاب للاشتباه فمخالفته لقانون أمن الطيران.

وكيجي هاد الحادث ضمن سلسلة ديال حوادث بحالو وقعات فالشهور الأخيرة. رحلة ديال شركة All Nippon Airways اللي كانت غادية لهيوستن، اضطرات تهبط هبوط اضطراري فمطار سياتل، من بعد ما حاول واحد الراكب يحلّ مخرج الطوارئ، وساعدو جوج ديال المحاربين القدامى طاقم الطيارة باش يسيطرو على الوضع، حسب محطة KRIV.