الرئيسية > آش واقع > كان طالب بعدم التصويت على الاحرار وهاجم أخنوش. الطالبي العلمي قصف الأزمي: هذاك ماشي خطاب سياسي يقولو وزير سابق.. ومايصلاحش يكون مسؤول ويصوتو عليه الناس
04/09/2021 21:30 آش واقع

كان طالب بعدم التصويت على الاحرار وهاجم أخنوش. الطالبي العلمي قصف الأزمي: هذاك ماشي خطاب سياسي يقولو وزير سابق.. ومايصلاحش يكون مسؤول ويصوتو عليه الناس

كان طالب بعدم التصويت على الاحرار وهاجم أخنوش. الطالبي العلمي قصف الأزمي: هذاك ماشي خطاب سياسي يقولو وزير سابق.. ومايصلاحش يكون مسؤول ويصوتو عليه الناس

عفراء علوي محمدي- كود//

هاجم رشيد الطالبي العلمي، عضو المكتب السياسي لحزب التجمع الوطني للأحرار، اليوم السبت، القيادي البيجيديست، إدريس الأزمي الإدريسي، اللي قال عليه، بالإشارة بلا مايذكر اسمو، أنه حقود، ولا يصلح أن يكون مسؤولا، من بعد ما هاجم الحمامة، بأسلوب ماشي تالهيه.

وتأسف الطالبي العلمي، فلقاء تواصلي للحزب بمدينة تطوان، “من المستوى اللي وصل ليه الخطاب السياسي”، وزاد: “يمكن مترشح عادي يقول مثل هاد الكلام كنعذروه، ولكن تجي من وزير سابق، وكيقول للمواطنين متصوتوش على الحمامة، هذا دابا يصوتو عليه الناس؟”، كيتساءل العلمي، في إشارة للبيجيديست.

وكيقول القيادي التجمعي أن الحمامة عندها نسائها ورجالها اللي كيصوتو عليها، اما خطاب هذا خاصو يرتقي ويحترم واجب التحفظ!

ولبارح الجمعة، هاجم الأزمي التجمع الوطني للأحرار، فلقاؤو مع ساكنة جماعة أولاد الطيب بفاس، وطلب منهم مايصوتوش على مرشح الحمامة فدائرة فاس الجنوبية، اللي مرشح فيها حتى هو، واتهمو بالفساد.

وماتوقفش عند هذشي، الأزمي وجه وابل من الاتهامات للحزب ككل وقيادييه، وحتى للأمين العام اخنوش اللي قال عليه مايصلاحش يكون رئيس الحكومة، وهذشي اللي انتقدو العلمي.

ومن جهة خرى، قال الطالبي العلمي فلقاء تطوان اليوم أن الحزب متوقفش على الخدمة فهد السنوات، وكانو الخصوم كيتوقعو أنه غيتوقف، لكن ماحبسش.

وتابع القيادي نفسو أنه واخا السب والكذوب وفايك نيوز والافتراءات اللي كيتوجهو بيها للأحرار، هوما اللي عياو، “وحنا يلاه بدينا، لأننا حاملين مع الرئيس هم هاد المشروع، وغادي نمشيو حتى للنهاية”، حسب تعبيرو.

وكشف أن التجمع كانت عندو صعوبة فحصر اللوائح فتطوان، لوجود إقبال كبير، والناس اللي ما درناهومش فاللائحة بقاو فالحمامة وكيدافعو عليها، “لائحة التجمع باعتراف الجميع هي أحسن لائحة فتطوان، وحنا كنخدمو ومكنسبو حد، ودرنا فتطوان تغطية وصلات لـ80 فالمية”.

“وبفضل منهجية وطريقة اشتغال السيد الرئيس أخنوش وأهدافو، وبات هناك إيمان بأن التغيير للأفضل هو مع التجمع، والناس راهوم معاك السيد الرئيس”، حسب تعبير الطالبي العلمي.

موضوعات أخرى

27/09/2021 21:30

توقع. أمزازي غادي يبقا وزير للتربية الوطنية واحتمال يجمد العضوية ديالو فـ الحركة الشعبية.. والعنصر لـ”كَود”: إيلا بغاه سيدنا ماعندنا مانقولو