وكالات//

كيستعد كانيي ويست، مغني الراب المعروف، ومراتو بيانكا سينسوري يدخلو فدعوى قضائية ضد طبيب أسنان مشهور فبيفرلي هيلز، وكيتهاموه بالإهمال الطبي، الاستغلال، واستعمال مواد ممنوعة.

كيقولو أنه هو السبب فإدمان كانيي على غاز أكسيد النيتروز، لي معروف بـ”غاز الضحك”.

وحسب بلاغ صحفي خرجات بيه بعض وسائل الإعلام الأمريكية، الزوجين بلغو الدكتور توماس كونيلي رسمياً بنيتهم يديرو عليه قضية، بحيث كيتقال أنه كان كيشد من كانيي 50 ألف دولار فالشهر مقابل الغاز، وهاد الشي خلاه يتعرض لأضرار عصبية وجسدية، اضطرابات، وخسائر مادية وعاطفية أثرت حتى على زواجهم.

البلاغ زاد واتّهم كونيلي أنه حاول يستولى على الماركة التجاريةYeezy، لي تابعة لكانيي ويست، فواحد المرحلة لي كان فيها ويست تحت تأثير الغاز، وهاد التصرف سماه المحامي ديالهم “محاولة استغلال مقصودة”.

وكان ميلو يانوبولوس، لي كان خدام مع كاني من قبل، قال فشي وقت سابق أن كاني مدمن على هاد الغاز، واتهّم كونيلي بأنه استغل الوضع باش يربح، ولكن الفريق القانوني ديال الطبيب نفى هاد الاتهامات، وقال أنها غير صحيحة وكتغلط الناس.

+++