كود سبور//

وجه الجنوب افريقي باتريس موتسيبي رئيس الاتحاد الافريقي لكرة القدم، نداء ديالو لسكان تنزانيا وكينيا واوكندا باش يعتقو القضية بخصوص لوطيلات اللي قلال فكاس افريقيا اللي غاينظموها بلدانهم عام 2027.

واستغل باتريس موتسيبي التواجد ديالو بعاصمة تنزانيا دار السلام، باش يوجه ميساج للتنزانيين والكينيين والاوگنديين حيث هذه الدول فيها خصاص ديال لوطيلات، وهذا الشي كايهدد فشل نسخة كاس افريقيا 2027، وقال لهم اللي عندو شي دار وشي شومبر يكريها فكاس افريقيا باش يلقاو الجماهير اللي جايين فين يگلسو ومنها حتى هما يدخلو الصرف فهاد المناسبة.

وكاتواجه نسخة كاس افريقيا 2027، مجموعة من الانتقادات، خصوصا وأنها تقدر ترجع بالكورة الأفريقية بزاف اللور، بعدما تقدمت بسنوات مع تنظيم المغرب لكاس افريقيا 2025، بمعايير عالمية راقية وبنية تحتية متطورة بزاف حتى على أوروبا، وهذا الشي اللي خلى هذه النسخة الأحسن فتاريخ كوب دافريك.